Qazaqstandyqtar Brıýsselde de daýys berip jatyr

BRıÝSSELЬ. QazAqparat – Brıýsselde QR Konstıtýtsııasyna ózgerister men tolyqtyrýlar engizý jónindegi referendýmǵa baılanysty Qazaqstannyń Belgııa Koroldigindegi Elshiligi janynda uıymdastyrylǵan №241 ýchaskesi jumys istep tur, dep habarlaıdy QazAqparat menshikti tilshisi.

Ýchaske Brıýssel ýaqytymen saǵat 7-de ashyldy. Daýys berý zańnamada belgilengen tártippen bastaldy.

Referendým ýchaskesi 200 qazaqstandyqty qabyldaýdy josparlap otyr. Olardyń arasynda dıplomattar men olardyń otbasy músheleri, eýropalyq ınstıtýttar janynda tirkelgen jýrnalıster, shyǵarmashylyq ıntellıgentsııa, ǵylymı qoǵamdastyq, bıznes jáne stýdent jastar bar.

Belgııa men Lıýksembýrgte turaqty turatyn nemese osy elderde ýaqytsha júrgen qazaqstandyqtar daýys berý úshin myna mekenjaıǵa kele alady: Brıýssel qalasy, Ýkkel kommýnasy, Van Bever avenıý, 30 úı.

Qoldanystaǵy zańnamaǵa sáıkes, Brıýsselde daýys berý Ortalyq Eýropa ýaqytymen 20:00-ge deıin ótedi.

Buǵan deıin habarlaǵanymyzdaı, Japonııa men Koreıada turatyn Qazaqstan Respýblıkasynyń azamattary elimizdiń Konstıtýtsııasyna ózgerister men tolyqtyrýlar engizý jónindegi jalpyulttyq referendýmda ózderiniń daýys berý quqyǵyn alǵashqylardyń biri bolyp paıdalandy.

Sheteldegi daýys berý ýchaskeleri jergilikti ýaqytqa saı ashylyp, referendýmǵa qatysýǵa nıetti qazaqstandyqtardy qabyldap jatyr.

Bishkektegi qazaqstandyqtar da daýys berip jatqany habarlandy.