Qazaqstandyqtar bir mezgilde 100 myń aǵash otyrǵyzady
ANA. 22 sáýir. QazAqparat /Jasulan Amanbaıuly/ - «Jasyl japyraq - Zelenyı lıst» aktsııasy aıasynda qazaqstandyqtar bir mezgilde 100 myń túpten astam aǵash kóshetterin otyrǵyzady.
Bul týraly búgin Astanada ótken baspasóz máslıhatynda «Tabıǵat» ekologııalyq odaǵynyń tóraǵasy Mels Eleýsizov málim etti.
M. Eleýsizov QR prezıdenttigine úmitker retinde óz baǵdarlamasynda respýblıkamyzdy kógaldandyrý bastamasyn kótergen edi. Bul ıdeıa Elbasy N.Nazarbaevtyń qoldaýyna ıe bolyp, Úkimet atalmysh máselemen aınalysýdy Aýyl sharýashylyǵy mınıstrligine júktegen bolatyn.
Bastama aıasynda erteń, 23 sáýir kúni eldiń árbir aımaqtarynda 100 myń túpten astam aǵash kóshetteri otyrǵyzylmaq. Ekologtardyń úndeýine Qazaqstannyń barlyq azamattary qoldaý bildirgen. Ekoodaq basshysynyń aıtýynsha, bul sharaǵa 1 mln. astam adam, sonyń ishinde 360 myń jas býyn ókilderi qatysady. Qazirgi ýaqytta Aýyl sharýashylyǵy mınıstrligi Orman jáne ańshylyq sharýashylyǵy komıtetiniń barlyq vedomstvolyq qurylymdary men uıymdary sharaǵa tartylyp, 140 myń danaǵa jýyq kóshet daıarlandy.
«Bıyl jasyl ekpeler egý sharasy Qazaqstan Táýelsizdiginiń 20 jyldyǵyna jáne Dúnıejúzilik Jer kúnine arnalyp otyr. Aktsııa maqsaty elimizdiń árbir óńirin kóriktendirip, ekologııa máselelerin sheshý, jastardy týǵan ólkege jáne memleketimizdiń bolashaǵyna qamqorlyq jasaý rýhyna tárbıeleý»,-deıdi M. Eleýsizov.
Memlekettik orman qorynyń aýmaǵynda qalamshalar men kóshetter otyrǵyzý naýqany da osy sharaǵa tuspa-tus kelip otyr. Sondyqtan oblys ákimdikteriniń qaraýyndaǵy orman sharýashylyǵy memlekettik mekemeleri 23 sáýirde shara sheńberinde aǵash tuqymdarynyń 3,4 mln. danadan astam ekpesin otyrǵyzady. Uıymdastyrýshylardyń aıtýynsha, bul jyl saıyn 22 naýryz ben 22 sáýir aralyǵynda ótkizilip turatyn dástúrli sharaǵa aınalady. Jyl saıyn egiletin kóshetterdiń sany arttyryla beredi, 15-20 jyl ótken soń bolashaq urpaq bul sharanyń naǵyz jemisterin kóretin bolady.
«Eger biz bul sharany jyl saıyn ótkizip otyrsaq, Qazaqstan birneshe jyldardan keıin jasyl memleketke aınalady»,-deıdi M. Eleýsizov. Ekologtyń atap ótkenindeı, bir mezgilde 100 myńnan astam kóshet otyrǵyzý sharasyn ol Gınness rekordtar kitabyna engizýge suranym joldaǵan. Komıssııa óz kezeginde bul sharaǵa qyzyǵýshylyq tanytyp, kelesi jyly ózderiniń baqylaýshylaryn jiberetindikteri jóninde ýáde etken.
