Qazaqstandyqtar bir kúnde eń kemi 2,2 dollar jumsaıdy

NUR-SULTAN. QazAqparat – Qazaqstandyqtar bir kúnde eń kemi 2,2-2,5 dollar jumsaıdy. Ulttyq banktiń qazirgi baǵamy boıynsha bul soma 928-1055 teńge shamasynda, dep habarlaıdy QazAqparat tilshisi.

«Eń kedeı elder óz halqy úshin keminde kúnine 1 dollarǵa ómir súrýdi qamtamasyz etýge tyrysady, damýshy elder – kúnine 1,9 dollar, odan keıin – kúnine 2,5 dollarǵa umtylady, damyǵan memleketterde kúnine 5,5 dollar jumsalady. Biz damýshy elmiz, sondyqtan ekonomıkalyq jaǵdaı bizge satyp alý qabiletiniń parıteti boıynsha kúnine 2,2-2,5 dollar jumsaýǵa múmkindik beredi. Bul halyqaralyq standart normalaryna sáıkes keledi», - dedi QR Eńbek jáne halyqty áleýmettik qorǵaý mınıstrligi Áleýmettik kómek departamentiniń dırektory Asqar Nııazov Ortalyq kommýnıkatsııalar qyzmetinde.

Onyń aıtýynsha, 2020 jyly ataýly áleýmettik kómek alǵan 47 myń otbasy, al 2021 jyly 51 myń otbasy kedeılik jaǵdaıynan shyqqan. 2020 jyly jalpy somasy 65,6 mlrd teńgege AÁK tólengen. Bul rette respýblıkalyq bıýdjetten 57,5 mlrd teńge, jergilikti bıýdjetten 8,1 mlrd teńge qarastyrylǵan. 1 mamyrdaǵy jaǵdaı boıynsha AÁK 111,4 myń otbasy nemese 571,1 myń adam aldy.

Sondaı-aq A. Nııazov Qazaqstandaǵy kedeılik shegi eldiń ekonomıkalyq múmkindikteri boıynsha bekitiletinin túsindirdi. Ol belsendiliktiń áleýetin tómendetýge emes, arttyrýǵa múmkindik beretin shekte bekitilgen.

«2019 jyly járdemaqy mólsheri ósken kezde sátsiz tájirıbeni bastan ótkerdik. Saldarynan adamdar járdemaqy alý úshin tabystaryn jasyra bastady, jumystan shyqty, ajyrasty. ıAǵnı AÁK alý úshin jalǵan ajyrasýdy kórsetkileri keldi . Mundaı faktiler kóp boldy. AÁK deńgeıi ómir súrýge qolaıly jáne áleýetti arttyrýǵa yqpal etýi tıis. Sondyqtan bul kómekti shartty jáne shartsyz túrge bólýge týra keldi. Shart boıynsha – biz memleket retinde adamdy jumysqa ornalastyrý jóninde mindetteme alamyz, eger ol bas tartsa, kedeılikten shyǵýǵa múddeli bolmasa, úıde otyrǵysy kelse jáne tek járdemaqy alatyn bolsa, mundaı adamǵa AÁK taǵaıyndalmaıdy», - dedi Asqar Nııazov.