Qazaqstandyqtar bir aıda jańa kólik alýǵa 50,6 mlrd teńge jumsaǵan

ASTANA. QazAqparat - Resmı málimetke sáıkes, Qazaqstanda s ońǵy alty aıdyń ishinde dılerler 20 876 myń jańa kólikti satty. Sonyń ishinde eksportqa shyǵarylǵan avtokólikter de bar. Jalpy, kólik salondarynyń tabysy 180,7 mlrd teńgeni qurady, dep habarlaıdy QazAqparat tilshisi Qazaqstannyń avtobıznes qaýymdastyǵyna silteme jasap. 

Qazaqstandyqtar maýsym aıynda jańa kólikterdi satyp alýǵa 50,6 mlrd teńgeni jumsaǵan. Eskportqa shyǵarylǵan ónimdi birge sanaǵanda bir aıdyń ishinde 5172 kólik satyldy. Bul mamyr aıymen salystyrǵanda 34 paıyzǵa artyq. Sol kezde 3868 kólik satylǵan bolatyn.  

Qazaqstannyń kólik naryǵynda Toyota áli kúnge deıin joǵary suranysqa ıe. Odan keıin Lada, UAZ, Ravon men Renault keledi.

Budan bólek, SsangYong  (+146%), Renault (+71%), Chevrolet (+59%) pen JAC (+44%) kólikteriniń kóptep satyla bastaǵany baıqalady. Al Skoda (-40%), Infiniti (-46%) men Ford (-57%) kólikteriniń saýdasy tómendep ketti.

Sonymen qatar, Iveco kólikteriniń saýdasy qyza tústi. Aǵymdaǵy jyly mamyr aıynda 8-aq kólik satylsa, maýsymda atalǵan kórsetkish 213 danaǵa jetti. Sondaı-aq, KAMAZ ben Mercedes-Benz Trucks markaly kommertsııalyq kólikter saýdasy eki ese, tipti úsh esege artty.

Jalpy, búginde kommertsııalyq kólikter naryqtyń 18,6 paıyzyn alyp otyr. Sonyń ishinde júk kólikteri - 64 paıyz,  LCV- 15,7 paıyz, sondaı-aq avtobýstarǵa naryqtyń 20,3 paıyzy tıesili.

Avtobýstar segmentinde Iveco markaly kólikterdiń úlesi basym - 89 paıyz, qalǵanyn Hyundai men LıAZ ózara bólisip otyr.

Maýsym aıynda ishki suranys qana emes, syrtqy tapsyrystar kúrt ósti. Ótken aıda 584 kólik shetelge satyldy. Mamyr aıynda atalǵan kórsetkish 47 kólik bolǵan. Jalpy, alty aıdyń ishinde Qazaqstanda qurastylǵan 925 kólik syrtqa satyldy. Ol taýardyń ishinde Hyundai, JAC ,Toyota, Lexus pen Lada-nyń ónimderi bar.