Qazaqstandyqtar bir aıda 2309 altyn quıma satyp alǵan

ALMATY. QazAqparat – Qazaqstandyqtar 2021 jyldyń aqpan aıynda ekinshi deńgeıli bankterden jáne banktik emes aıyrbastaý pýnkterinen jalpy salmaǵy 59,2 keli, 2 309 altyn quıma satyp aldy, dep habarlaıdy QazAqparat tilshisi.

Ulttyq banktiń málimetinshe, 2017 jyldan bastap jalpy salmaǵy 1,74 tonna bolatyn 47 302 altyn quıma satyldy.

Altyn quımalary 5, 10, 20, 50 jáne 100 gramdyq bolyp bes salmaqta satylǵan. Sonyń ishinde eń kóp satylǵany 10 gramdyq quıma.

Satylǵan barlyq quımanyń ishindegi onyń úlesi 28% – 12 932 dana. Odan keıin 100 gramdyq quıma - 10 830 dana (23%) jáne 20 gramdyq - 10 637 dana (22%), 5 gramdyq – 7 235 dana (15%), 50 gramdyq – 5 668 dana (12%).

Negizinen ólshengen quımalar Almaty, Nur-Sultan jáne Atyraý qalalarynda suranysqa ıe.

«Altyn quımalar senimdi ınvestıtsııalyq qural bola alady. Bankter men banktik emes aıyrbastaý pýnktteriniń klıentke aqshasyn tólep, quımalardy «kúnbe-kún» satyp ala alatyn múmkindigi – altyn quımalar naryǵynyń ótimdiligin qamtamasyz etýde negizgi faktorǵa aınalyp otyr. Baǵdarlama iske qosylǵan ýaqyttan beri jalpy salmaǵy 3,7 keli ólshengen tek qana 140 quıma satyp alýǵa qabyldandy. Bul, árıne, altyn quımalardyń uzaq merzimdi ınvestıtsııalaý men jınaqtaý quraly bolýyna baılanysty»- dep habarlady Ulttyq bank.

Árbir quıma qorǵanysh elementterimen jabdyqtalǵan (quımalardyń bet jaǵy aınadaı, mıkromátin jáne bederli gýrt), sonymen birge quımalardy mehanıkalyq zaqymdanýdan qorǵaıtyn jáne qaptamasynyń ashylǵan-ashylmaǵanyn tez anyqtaýǵa múmkindik beretin arnaıy qaptamada shyǵarylady. Qorǵanysh qaptamasy da quıma sapasynyń sertıfıkaty sanalady. Sondyqtan quımany uqypty saqtap, qaptamasyn ashpaǵan durys.

Qazirgi ýaqytta altyn quımalardy Halyk Bank-te, Eýrazııalyq bankte, Jusan Bank-te, Bank TsentrKredıtte, sondaı-aq banktik emes aıyrbastaý pýnktterinde satyp alýǵa jáne satýǵa bolady.