Qazaqstandyqtar bir apta ishinde ýtılızatsııaǵa qansha mashına tapsyrdy
Baǵdarlamanyń úılestirýshisi - "ÓKM Operatory" JShS málimetine sáıkes, ýtılızatsııaǵa túsken kólikterdiń basym bóligi 25-30 jyl buryn shyǵarylǵan.
Olardyń ishinde «VAZ»-dar, «GAZ-3110», «Moskvıch-2140», al sheteldik kólikterden «Mazda 626» jıi kezdesedi.
"Eń eski kólik - shyqqanyna 70 jyldan asqan «Moskvıch», al jańalardyń arasynda 2007 jylǵy "VAZ-2104" kóligi bar. Búginde Qostanaı qalasy eski kólikterdi tapsyrý jaǵynan oq boıy ozyq tur. Bir aptanyń ishinde 38 mashına tapsyryldy. Al Aqtaý men Atyraýda bir-bir kólikten ǵana ýtılızatsııaǵa bergen", - delingen resmı xabarlamada.
Aıta keteıik, ótken aptada ýtılızatsııalaý baǵdarlamasy aıasynda eski kólikterdi qabyldaý jumystary bastaldy. Ol úshin respýblıkanyń 17 qalasynda qabyldaý beketteri ashyldy.
"ÓKM (óndirýshilerdiń keńeıtilgen mindettemeleri) Operatory" JShS basqarýshy dırektory Rýstam Temirbekovtyń aıtýynsha, jyldyń aıaǵyna deıin 10 myń kólikti qabyldaý jospary bar. Oǵan bıýdjetten kvota, ıaǵnı tıisti qarajat bólinip otyr. Baǵdarlama aıasynda 3,5 tonnadan aspaıtyn jeńil kólikter qabyldanady. Al ýtılızatsııalyq tólemniń kólemi avtomobıldiń texnıkalyq jaǵdaıyna qaraı belgilenedi. Tolyq komplektatsııasyna 150 000 teńge berilse, isten shyqqan kólikter úshin 48 000 teńge tólenedi.
"Eski kólikti tapsyrý úshin aldymen sol aımaqta kvotanyń bar joǵyn tekserip alý qajet. Sondaı-aq www.avto.recycle.kz saıtynan kóliktiń qaı sanatqa jatatynyn bilýge múmkindik bar. Dál qazir biz esikti bólek, shanaqty bólek eseptep jatqan joqpyz. Ázirshe, eki-aq kategorııa bar. Ol - 150 jáne 48 myń teńgeniń ótemaqysy", - deıdi R.Temirbekov.
Onyń sózine qaraǵanda, baǵdarlama aıasynda eski kólikti qabyldaý beketine deıin jetkizý qyzmeti qarastyrylmaǵan. Sondyqtan kólik ıesi ony óz kúshimen alyp kelýi tıis. Alaıda keıbir jerlerde eski kólikterdi jınap, birden qabyldaý beketine jetkizýge nıetti kásipkerler bar.
