Qazaqstandyqtar bilimge qansha aqsha jınady
ASTANA. QazAqparat - Osy ýaqytqa deıin qazaqstandyqtar memlekettik bilim berý jınaqtaý júıesine biraz aqsha quıdy. Depozıtin bilimge jumsaǵandar da az emes, dep habarlaıdy QazAqparat tilshisi.
«Qarjy ortalyǵy» AQ prezıdenti Asqar Ibraımovtyń aıtýynsha, búginde Qazaqstan halqynyń bilimge jınap jatqan aqshasy 18 mlrd teńgege jetti.
«Negizi, ondaı júıe kórshi TMD elderinde de, shetelde de joq. Qazirgi kezde qazaqstandyqtar memlekettik jınaq júıesin jıi qoldana bastady. Olar aqshany bilimge jumsap jatyr. Jınaq júıesine sáıkes, depozıti bar adam ekinshi deńgeıli bankterden oqýǵa nesıe alady. Kepildik berýdiń qajeti joq. Sebebi Qarjy ortalyǵy nesıeniń qaıtarylýyna ózi kepil bolady. Oqýdan keıin alty aı beriledi. Osy ýaqyttyń ishinde bilim alǵan adam jumysqa turýy qajet. Sodan keıin nesıeni qaıtarýdy bastaıdy», - dedi A.Ibraımov QazAqparat tilshisine bergen suhbatynda.
Aıta keteıik, memlekettik bilim berý depozıtin atalǵan baǵdarlamaǵa qatysatyn kez kelgen bankten ashýǵa bolady. Ondaı salymdarǵa banktiń 14 protsenttik syıaqysy tólenedi. Budan bólek, memlekettik syıaqy taǵy bar. Áleýmettik jaǵynan az qamtylǵan azamattardyń memlekettik syıaqysy 7 protsentti quraıdy. Basqa azamattarǵa 5 protsent tólenedi.
