Qazaqstandyqtar bılıardtan álem chempıonatynda úshinshi oryn aldy
ALMATY. QazAqparat - Qazaqstan sportshylary Almatyda ótip jatqan bılıard chempıonatynda qozǵalmaly pıramıda boıynsha úshinshi orynǵa taban tirep, qola medalge qol jetkizdi, dep habarlaıdy QazAqparat tilshisi.
Ulttyq qurama álem birinshiliginde jeńis tuǵyryna kóterilý mindetin oryndady.
Aqtyq synǵa úsh dúrkin álem chempıony Álıhan Karaneev pen Maksım Pan sál ǵana jetpeı qaldy.
Álıhan Karaneev Pavel Rodıonovty jeńgen soń Ýkraına sportshysy Dmıtrıı Belozerovpen baq synasty.
Ýkraına sportshysynyń asyǵy alshysynan túsip, 6:1 esebimen jeńiske jetti.
Qazaqstandyq Maksım Pan jartylaı fınalda 2017 jylǵy álem chempıony, reseılik Iosıf Abramovpen kezdesti. Maksım Reseı sportshysynan kem oıyn kórsetpedi. Onyń jeńýge bar múmkindigi boldy. Segizinshi partııada ol 4:4 etip esepti teńestirip úlgerdi.
Alaıda Abramov eki partııany qatar jeńip, fınalǵa joldamany alyp ketti.
Aıta ketý kerek, Pan onyń aldynda 2016 jylǵy álem chempıony Leonıd Shvyrıaevty týrnırden shyǵaryp jibergen bolatyn.
Endi aqtyq synda reseılik Iosıf Abramov pen ýkraınalyq Dmıtrıı Belozerov baq synasatyn bolady.
Áıelder arasyndaǵy aqtyq synda reseılik Dıana Mıronova men Belarýs sportshysy Ekaterına Perepechaeva kezdesedi.
Fınaldyq oıyndar 8 sáýirde Balýan Sholaq atyndaǵy Sport saraıynda ótedi.
