Qazaqstandyqtar Beıjińde bolashaq baǵyn otyrǵyzdy
BEIJІŃ. QazAqparat - Halyqaralyq balalardy qorǵaý kúnine oraı qazaqstandyq dıplomattar, ulttyq kompanııalardyń ókilderi men olardyń otbasy músheleri Qazaqstannyń Qytaıdaǵy elshiliginiń aldyna aǵashtar men gúlder otyrǵyzdy, dep habarlaıdy «QazAqparat» HAA-nyń Qytaıdaǵy menshikti tilshisi.
Qazaqstannyń Qytaıdaǵy elshisi Shahrat Nuryshevtiń sózinen jáne balalar qoıǵan kontsertten keıin qazaqstandyqtar gúlder jáne 25 túp aǵash otyrǵyzdy. Aǵashtar osy shara úshin arnaıy Sıan qalasynan jetkizilgen. Bul sharaǵa balalar da qolǵabys etti.
«Búgin biz «Bolashaqtyń baǵyn» otyrǵyzdyq. Biz qalaı desek te balalar bizdiń bolashaǵymyz. Olar - ómirdiń kórki. Bolashaqqa kóz sala otyryp biz búgin Elshilik mańyna «ýaqyt kapsýlasyn» saldyq. Onda óskeleń urpaqqa degen bizdiń ósıetimiz bar»,-dedi «QazAqparat» HAA-niń tilshisine sharany uıymdastyrýshylardyń biri Sáýle Nurǵalıeva.
Aǵash otyrǵyzý sharasynan soń balalarǵa arnaıy dastarhan jaıylyp, olar búgingi sharaǵa Beıjińdegi áıelder keńesiniń ókilderi daıyndaǵan astardan dám tatty.
