Qazaqstandyqtar bankomattan kóbirek aqsha ala bastady
ASTANA. QazAqparat - Qazaqstandyqtar bankomattan kóbirek aqsha ala bastady, dep habarlaıdy QazAqparat tilshisi ranking.kz-ke silteme jasap.
Alǵashqy jartyjyldyqta qazaqstandyqtar el aýmaǵynda tólem kartalarynan jalpy 6,2 trıllıon teńge aqsha alǵan. Bul byltyrǵy kórsetkishten 25,4% artyq. Sonyń 84,8%-y nemese 5,2 trıllıon teńge bankomattardan alynǵan, bul jaǵynan da kórsetkish byltyrǵy jarty jyldyqqa qaraǵanda 28,7%-ǵa artyq. POS-termınaldar arqyly aqsha alý kólemi 9,8% artyp, 932,9 mıllıard teńgege jetti.
Búkil respýblıkada tólem kartalarynan qolma-qol aqsha berý kólemi artqan. Degenmen bul rette kóshbasshy Almaty oblysy bolyp otyr. Óńirde ústimizdegi alǵashqy alty aıda bul kórsetkish 34,6% ósip, 281,4 mıllıard teńgeni quraǵan.
Bir aıta keterligi, kartadan qolma-qol aqsha alýdyń basym bóligi bankomattardyń úlesine týra kelse de, maýsym aıynda olardyń jalpy sany 8,8 myńdy qurady. Bul ótken aıdaǵyǵa qaraǵanda 1,1 myńǵa az.
«Qolma-qol aqsha alý tranzaktsııalarynyń jyldyq mólsheri 14,4% artyp, 129,4 mıllıondy qurady, sonyń 122,3 mıllıony bankomattardyń úlesine týra keledi (jyldyq ósim - 16,7%). POS-termınal arqyly júrgizilgen tranzaktsııalardyń mólsheri, kerisinshe, 14,7%, ıaǵnı 7,1 mıllıonǵa qysqarǵan. 2018 jyldyń qańtar-maýsym aılarynda tranzaktsııalardyń ortasha chegi 47,5 myń teńge boldy (byltyr bul kórsetkish - 43,4 myń teńge bolatyn). Bankomat arqyly ortasha 42,7 myń teńge (byltyr - 38,7 myń teńge) alynsa, POS-termınal arqyly júrgizilgen tranzaktsııalardyń ortasha chegi 131,3 myń teńgeni (byltyr - 102 myń teńge) quraǵan», - delingen saıtta.
