Qazaqstandyqtar bank jáne mıkroqarjy uıymdarynyń jumysyna qatysty 35,3 myń hat joldaǵan

ASTANA. QazAqparat – Byltyr qazaqstandyqtar tarapynan bank jáne mıkroqarjy sektoryndaǵy uıymdardyń jumysyna qatysty 35 myńnan astam ótinish túsken. Mundaı derekter Qarjy naryǵyn retteý jáne damytý agenttigi ashyq talqyǵa shyǵarǵan Retteý saıasatynyń konsýltatıvtik qujat-jobasynda jazylǵan, dep habarlaıdy QazAqparat tilshisi.

«Byltyr Qarjy naryǵyn retteý jáne damytý agenttigi jeke jáne zańdy tulǵalardyń 35 337 ótinishin qarady. Al 2021 jyly mundaı ótinishter sany 42 925 boldy. Tutynýshylar ótinishiniń 99% bank jáne banktik emes uıymdar sektoryna tıesili. Taldaý kórsetkendeı, bank jáne mıkroqarjy salasyndaǵy negizgi ótinishter – banktik qaryzdar men mıkrokredıtterdi keshirý, olardy qaıta qaraý jáne normatıvtik-quqyqtyq aktilerdiń normalaryn túsindirý baǵytynda. Zertteý nátıjesinde qaryz alýshynyń boryshtyq júkteme koeffıtsıentin durys eseptemeý, jasyryn komıssııalar, syıaqy mólsherlemesiniń shekti máninen jáne jyldyq tıimdi syıaqy mólsherlemesinen asyp ketý, jalǵan tutynýshylyq kredıtterdi resimdeý sııaqty problemalar anyqtalady», - dep jazylǵan Ashyq NQA portalynda jarııalanǵan Retteý saıasatynyń konsýltatıvtik qujatynda.

Qosa ketsek, buǵan deıin ıpoteka alatyndar azaıyp, kepilsiz nesıege suranys artqanyn jazǵan edik.