Qazaqstandyqtar balyqty az tutynady – mınıstr

NUR-SULTAN. QazAqparat – Qazaqstan balyqty az tutynady. Bul týraly búgin ótken Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Qazaqstan balyqty az tutynady. Dúnıejúzilik densaýlyq saqtaý uıymy adam basyna shaqqanda jylyna 16 keliden kem emes balyq tutynýdy usynsa, Qazaqstanda bul kórsetkish bir adamǵa 4 keliden keledi. Óz kezeginde, kórshiles Reseıde adam basyna 23 kg, Qytaıda 45 kg balyq tutynylady. Osylaısha, shekara mańyndaǵy aýdandardy eskergende, balyq ónimderiniń eksporttyq áleýeti 3 mln tonnadan asyp túsýi múmkin», - deıdi Maǵzum Myrzaǵalıev.

Sondaı-aq onyń aıtýynsha, búgingi tańda Qazaqstanda 1 myńnan astam balyq sharýashylyǵy sýbektisi jumys isteıdi.

«Olarǵa 1646 balyq sharýashylyǵy sý qoımasy jáne olardyń ýchaskeleri bekitilgen. Salada 11 myńnan astam adam jumys isteıdi. 2019 jyly 45 myń tonna balyq aýlanǵan. Negizgi balyq aýlaý Atyraý, Almaty, Shyǵys Qazaqstan jáne Qyzylorda oblystarynda iske asyrylady», - dedi mınıstr.