Qazaqstandyqtar avtostantsııalarda bıletti tsıfrlyq jeke kýálikpen satyp ala alady

NUR-SULTAN. QazAqparat – Qazaqstandyqtar tsıfrlyq jeke kýálikti endi avtokólikpen tasymaldaý salasynda qaǵaz túrindegi jeke kýálikpen teń paıdalana alady. QazAqparat bul traly QR Indýstrııa jáne ınfraqurylymdyq damý mınıstrligine silteme jasap habarlaıdy.

Atap aıtqanda, jolaýshylar aýdanaralyq, qalaaralyq, oblysishilik baǵyttarda avtobýstarǵa otyrǵyzý kezinde jeke kýáligin óz qalaýy boıynsha - túpnusqada nemese elektrondyq qujat túrinde (uıaly telefon arqyly) usyna alady.

Sondaı-aq, avtovokzaldarda, avtostantsııalarda, jolaýshylarǵa qyzmet kórsetý tirekterinde tsıfrlyq jeke kýálikpen bıletter satyp alýǵa bolady. Budan bólek, halyqaralyq, qalaaralyq, oblysaralyq, aýdanaralyq (oblysishilik, qalaaralyq) baǵyttarda jol júrý kezinde júk alý múmkindigi kózdelgen.

«Sonymen qatar taksı júrgizýshileri reıs aldyndaǵy jáne reısten keıingi medıtsınalyq kýálandyrýdan ótý kezinde jeke kýálikti qaǵaz tasyǵyshta da, elektrondyq nysanda da paıdalana alady.

Joǵaryda atalǵan normalar QR Indýstrııa jáne ınfraqurylymdyq damý mınıstriniń buıryǵymen (2021 jylǵy 4 qazandaǵy№ 524) QR Úkimetiniń tapsyrmasy boıynsha tsıfrlyq tehnologııalardy damytý jáne azamattardyń jeke kýálikteriniń túpnusqalaryn ózimen birge alyp júrý qajettiliginsiz óz quqyqtaryn iske asyrý múmkindigin keńeıtý úshin qabyldandy», - delingen vedomstvo málimetinde.