Qazaqstandyqtar avtokólikterin onlaın tirkeı alady
Eger azamattyń elektrondyq-tsıfrlyq qoltańbasy bolsa, onda Mamandandyrylǵan halyqqa qyzmet kórsetý ortalyǵyna nemese ІІM-niń tirkeý-emtıhan bólimshelerine barmaı-aq, avtokólikterin elektrondyq úkimet portalynda rásimdeı alady.
«Vedomstvoaralyq komıssııa aıasynda biz memlekettik qyzmetterdi ońtaılandyrý jumystaryn júrgizýdemiz. Avtokólikterdi tirkeý qyzmetine degen suranys qarqyndy túrde ósip kele jatqandyqtan, biz bul qyzmetti elektrondyq nusqaǵa aýystyrý týraly usynys jasadyq. Bul jańashyldyq qyzmet alýshylardyń ýaqytyn únemdep qana qoımaı, mamandandyrylǵan HQO-daǵy júktemeni azaıtýǵa múmkindik beredi. Máselen, bizdiń korporatsııa arqyly bıylǵy bes aıda avtokólikti tirkeý jáne qaıta tirkeý boıynsha 745 592 qyzmet kórsetilgen», - dedi «Azamattarǵa arnalǵan úkimet» basqarmasynyń tóraǵasy Abylaıhan Ospanov.
Memlekettik korporatsııanyń baspasóz qyzmetinen habarlaǵandaı, portal arqyly ótinim bergende, eshqandaı qujattyń skan-nusqasyn usynýdyń qajeti joq. Óıtkeni qajetti málimetterdiń barlyǵy aqparattyq júıeler arqyly alynady.
«Buǵan deıin kólikti satýshy men satyp alýshy ótinim berý úshin bir ýaqytta «Azamattarǵa arnalǵan úkimettiń» front-ofısine baryp, qajetti qujattardy tapsyrýy tıis edi. Endi azamattar ótinimdi úıden shyqpaı-aq, onlaın tártipte joldaı alady. Elektrondyq úkimet portaly arqyly biz aldaǵy ýaqytta taǵy da birqatar memlekettik qyzmetterdi alý protsesin jeńildetpekpiz», - deıdi «Ulttyq aqparattyq tehnologııalar» AQ basqarma tóraǵasy Áset Turysov.
Qyzmetti onlaın alý úshin egov.kz portalynda tirkeýden ótip, satylatyn kólik jaıly aqparatty engizip, aıyppuldar men salyq tólemderin, tehnıkalyq jaǵdaıyn tekserýge suranys joldaý kerek. Eger tólenbegen qaryz bolsa, elektrondyq portal arqyly tóleýge bolady. Odan keıin avtokólikti satyp alýshy azamat elektrondyq úkimet portalyndaǵy jeke kabıneti arqyly satýshy qaldyrǵan ótinimmen tanysyp, aıyppuldardy teksergennen keıin nómir belgisine, kólik quralyn tirkeýge jáne tirkeý týraly kýálikke tólem jasaı alady. Satyp alýshy óziniń elektrondy-tsıfrlyq qoltańbasymen smart-kelisimdi rastaǵan soń mamandandyrylǵan HQO-ǵa nómir belgisin alyp ketý úshin ǵana keledi. Sondaı-aq nómirdi úıge jetkizý qyzmetine de tapsyrys berýge bolady.
Eske sala ketsek, 2018 jyldyń mamyr aıynan bastap QR Іshki ister mınıstrligi avtokólikti tirkeý kezindegi salystyrýdy alyp tastaǵan bolatyn. Endi esepten shyǵarý nemese kólikti tirkeý kezinde nómirlik agregatty teksertýdiń qajeti joq. Mundaı talap tek kólikti alǵash ret tirkegende qoıylady.
Sondaı-aq júrgizýshi kýáliginiń merzimi ótkenge deıin aýystyrý nemese joǵaltyp alý jaǵdaıynda medıtsınalyq tekseristen ótýdiń jáne psıhıatr, narkologtan anyqtama ákelýdiń qajeti joq. Al azamattyń elektrondyq-tsıfrlyq qoltańbasy bolsa, júrgizýshi kýáligin elektrondyq úkimet portaly arqyly onlaın tártipte aýystyrýǵa bolady.
