Qazaqstandyqtar aýa sapasyn mobıldik qosymsha arqyly baqylaıdy

ASTANA. QazAqparat - «Qazgıdromet» Qazaqstandaǵy atmosferalyq aýanyń sapasyna monıtorıng jasaıtyn mobıldik qosymshany iske qosty. Atalmysh qosymshany qazirdiń ózinde iOS jáne Android arqyly júktep alýyńyzǵa bolady, dep habarlaıdy «QazAqparat» HAA tilshisi vedomstvonyń baspasóz qyzmetine silteme jasap.

Qosymshanyń kómegimen kez kelgen qoldanýshy Qazaqstan aýmaǵyndaǵy atmosferalyq aýanyń sapasyn baqylaı alady.

AirKZ arqyly 46 eldimeken jáne 84 ekologııalyq beket boıynsha aqparat alýǵa bolady. Qoldanýshynyń ózine qajet beketti qolmen nemese qosymshadaǵy geolokatsııalyq aqparat arqyly avtomatty túrde anyqtaý múmkindigi bar.

Qosymsha siz tańdaǵan beket mańyndaǵy aýany lastap turǵan kontsentratsııalardyń negizgi kórsetkishterin jarııalaıdy. Onyń ishinde azot dıoksıdi, azot oksıdi, PM10 ólshengen bólshekteri, PM2.5 bólshekteri, shań, kúkirt dıoksıdi, sýtegi sýlfıdi jáne kómirtegi monoksıdi bar.