Qazaqstandyqtar Arys qalasynyń turǵyndaryna aqsha aýdarýda

NUR-SULTAN. QazAqparat - Qazaqstannyń Ulttyq Olımpıadalyq komıteti, Sporttyq jekpe-jek jáne kúsh qoldanylatyn sport túrleri konfederatsııasy, sondaı-aq sporttyq federatsııalar Arys qalasynyń turǵyndaryna gýmanıtarlyq kómekke birkúndik eńbekaqylaryn aýdarady, dep habarlaıdy QazAqparat.

QR Ulttyq olımpıadalyq komıteti taratqan málimette: «Osyndaı jaǵdaıda eshkim beı-jaı qaraı almaıdy. Sondyqtan Qazaqstannyń sportshylary qıyn jaǵdaıǵa tap bolǵan otandastaryna qoldaý kórsetýdi sheshti. Biz úshin Qazaqstan komandasy tek jarys kezinde ǵana mańyzdy emes. Bizdiń barlyq jankúıerlerimiz - bizdiń komanda», - delingen.

QR UOK qarajatty «Meniń Atamekenim» qoǵamdyq uıymy ashqan shotqa aýdarmaq.

Sondaı-aq gýmanıtarlyq kómekke bir kúndik jalaqylaryn Ortalyq kommýnıkatsııalar qyzmetiniń qyzmetkerleri de aýdaratyny málim boldy.

«Keshe bolǵan oqıǵalarǵa baılanysty, Aqparat jáne qoǵamdyq damý mınıstrliginiń Ortalyq kommýnıkatsııalar qyzmetiniń qyzmetkerleri bir kúndik jalaqysyn Túrkistan oblysy, Arys qalasynyń turǵyndaryna kómek retinde aýdarady. Bizdiń ujym qıyn-qystaýda otandastaryna qoldaý kórsetkisi keledi. Arystyń barsha turǵyndaryna qoldaý bildiredi», - dedi OQK dırektorynyń mindetin atqarýshy Mahabbat Sádýaqasova.

Eske sala ketsek, Arys qalasyndaǵy áskerı bólimniń qoımasynda keshe tańerteń jarylys bolǵandyǵy týraly habarlaǵan bolatynbyz. Apat saldarynan eki adam mert boldy.

Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.

Zardap shekkenderge kómek qolyn sozý maqsatynda elimizde «Arys, biz birgemiz» aktsııasy bastalǵanyn habarlaǵan bolatynbyz.