Qazaqstandyqtar arnaıy saıtta ıgi isterimen bólise alady (FOTO)
ASTANA. QazAqparat - Qazaqstanda #JaqsylyqJasa jobasy bastaldy, onyń aıasynda arnaıy saıt (https://dd.bnews.kz/) quryldy, saıtqa paıdalanýshylar jaqsylyq, ıgi áreketteri jaıly vıdeo, foto, áńgimeler júkteı alady.
«Birinshi kezekte, bárin adam ózinen bastaýy qajet dep oılaımyn. Ár adam ıgi is, jaqsylyq jasaýǵa umtylýy tıis. # JaqsylyqJasa jobasy ulttyq ıdeıaǵa aınalǵanyn qalaımyn. Ómirdi jaqsy jaqqa ózgertý úshin adamdar kúnige jaqsy is jasap otyrý qajet. Sol kezde ómir nurlana túsedi», - dedi qoǵam qaıratkeri, «DOM» RS basshysy Arýjan Saın Ortalyq Kommýnıkatsııalar qyzmeti brıfıngi barysynda.
Sondaı-aq saıtta esepteýish júrgiziledi. Qazirgi sátte qazaqstandyqtar eldiń ár óńirinen 64 jaǵdaımen bólisti. «Saıt elde qandaı ıgi ister jasalyp jatqany jaıly ózindik tarıhty qalyptastyrýǵa járdemdesetinine senimdimiz. Ár adam saıtqa óziniń qaıyrymdylyq, ıgi isteriniń tarıhyn jaza alady», - dep qosty «Qazkontent» AQ basqarma tóraǵasynyń orynbasary Zarına Nurlanova.
Aktsııa eki apta buryn bastalǵanyn atap ótken jón. Qaznette osy ýaqyt ishinde #JaqsylyqJasa jáne #DelaıDobro heshtegimen Qazaqstannyń ár túkpirinen 100-den astam post, rolıkter jarııalandy.
