Qazaqstandyqtar arasynda juqpaly aýrý deńgeıi tómendep keledi - DSM
ASTANA. 24 shilde. QazAqparat - Qazaqstanda 2013 jyldyń І jartyjyldyǵynda byltyrǵy jylmen salystyrǵanda juqpaly aýrýlardyń tirkelý kórsetkishi azaıdy. Bul týraly búgin Densaýlyq saqtaý mınıstrliginde ótken baspasóz máslıhaty barysynda Memlekettik sanıtarlyq-epıdemıologııalyq baqylaý komıtetiniń tóraǵasy Jandarbek Bekshın málimdedi.
Máselen, esepti kezeńde nozologııanyń 35 túri boıynsha aýrý-syrqaýdyń azaıǵany tirkeldi. Sonymen qatar, 2012 jyldyń osy kezeńimen salystyrǵanda salmonellez aýyrýynyń 21 %-ǵa, juqpaly ishek aýrýymen aýyrýdyń - 15,6%-ǵa, asqynǵan ishek aýrýlarymen aýyrýdyń - 18%-ǵa, sary aýrýymen aýyrýdyń 6,7%-ǵa azaıǵany anyqtalyp otyr.
«Budan bólek, kókjótelmen aýyrý (3 esege), kene entsefalıtimen aýyrý (3 tirkelgen jaǵdaıǵa tómen), Kongo-Qyrym qandy bezgegimen aýyrý (10 tirkelgen jaǵdaıǵa tómen), jedel vırýsty gepatıtimen aýyrý (35 %-ǵa), tynys joly músheleriniń týberkýlezimen aýyrý (8,2%-ǵa), qyshymamen aýyrý (13%-ǵa) áldeqaıda azaıǵan. Osy ýaqyt aralyǵynda tyrysqaq, oba, týlıaremııa, topalań, ishsúzek, qylaý, juqpaly tamaq aýrý, bezgek, trıhınellez jáne polıomıelıt aýrýlaryna shaldyǵý jaǵdaılary tirkelmegen», - dedi J. Bekshın.
