Qazaqstandyqtar áleýmettik jelide eýropalyq alaıaqtarǵa aldanýda

QOSTANAI. QazAqparat - Qostanaı oblystyq Іshki ister departamenti azamattardy Eýropada keńinen taraǵan ınternet-alaıaqtyq týraly eskertti. Zardap shekkenderdiń arasynda qazaqstandyqtar da bar. Atap ótilgendeı, alaıaqtar LinkedIn kásibı áleýmettik jelisin paıdalanady, dep habarlaıdy «QazAqparat» HAA tilshisi.

Alaıaqtar kompanııa basshylary týraly aqparat jınap, tipti baılanys nómirlerin anyqtap, olardyń atynan qaramaǵyndaǵy qyzmetkerlerge hat joldaıtyny belgili boldy.

Qostanaı oblystyq ІІD Krımınaldyq polıtsııa basqarmasynyń aǵa jedel ókili Aıdar Mýsınniń aıtýynsha, osyndaı hattar kóbine kompanııanyń qarjy nemese bas dırektorynyń jasandy elektrondyq poshtasynan onyń qarjy bólimine joldanady. Hat mátininde basshynyń belgili bir qarajat somasyn atalǵan shotqa aýdarý talaby jazylady. Іs júzinde alaıaqtar túpnusqa elektrondyq poshtaǵa uqsas poshtany bir árip nemese belgisin ózgertip qurady.

«Alaıaqtyqtyń bul túri CEO fraud dep atalady. Qylmyskerler áleýmettik psıhologııaǵa negizdelgen tehnıkany paıdalanady. Adamdar oǵan aldanyp, atalǵan shotqa aqsha aýdaryp turady. Hattyń mátini qandaı da bir fırmanyń standarttaryna barynsha uqsas bolýy úshin alaıaqtar kompanııanyń baspasóz paraqshalaryn belsendi oqyp, qyzmet salasyn tanyp alady», - dep atap ótti polıtsııa kapıtany.

Qylmyskerler  LinkedIn kásibı jelisin paıdalanady. Sebebi onda tirkelý ońaı. Onymen qosa, Facebook nemese Twitter-ge qaraǵanda, adamdar LinkedIn arqyly kásibı baılanystardy qurady, jumys izdeıdi.

Tártip saqshylary azamattarǵa qyraǵylyq tanytyp, jumys berýshi týraly aqparatty barynsha muqııat tekserýdi, beıtanys adamdardyń shottaryna aqsha jibermeýdi, kadrlar bóliminiń mamandarymen jeke sóılesýdi keńes etedi. Eger siz nemese jaqyndaryńyz kıberqylmyskerlerdiń áreketinen zııan kórseńiz, polıtsııanyń 102 nómirine shuǵyl habarlasqan jón.