Qazaqstandyqtar álemdegi eń az qozǵalatyndar tizimine endi
ASTANA. QazAqparat - Dúnıejúzilik densaýlyq saqtaý uıymy 168 memlekette halyqtyń sporttyq belsendiligi boıynsha jańa zertteýler júrgizdi. Qazaqstandyqtar bul tizimde eń az qozǵalatyndar qataryna endi, dep habarlaıdy QazAqparat «Habar 24» telearnasyna silteme jasap.
DDU-nyń málimetterine sáıkes, Qazaqstanda 18 jastan asqan erler men áıelderdiń 27,5 paıyzy sportpen kóp shuǵyldanbaıdy. Al Belarýs pen Qyrǵyzstanda bul kórsetkish aıtarlyqtaı jaqsy - halyqtyń 14 paıyzy az qozǵalady.
Sporttyq belsendilik jaǵynan Reseı, Ózbekstan jáne Ýkraına Qazaqstannyń aldynda tur. Al halqy eń kóp qozǵalatyn memleketter Ýganda men Mozambık bolyp tabylady. Onda turǵyndardyń 6 paıyzy ǵana sportqa jaqyn emes eken.
Bul rette, Kýveıt jáne Saýd Arabııasy syndy baı memleketterde eresekterdiń jartysynan astamy qozǵalysty súımeıtin bolyp shyqty. Olar reıtıngte AQSh pen Ulybrıtanııany da basyp ozǵan. Biraq ol elderde de kórsetkishter bir-birinen asa alshaq emes.
Osylaısha, álemdegi árbir besinshi eresek adam fızıkalyq jaǵynan belsendi emes. Osyǵan oraı, DDU dabyl qaǵyp, ınfektsııalyq emes syrqattarǵa shaldyqqandar sany artyp otyrǵanyn aıtýda. Olardyń arasynda júrek aýrýlary, qant dıabeti, sút bezi men toq isheginiń qaterli isigi bar.
DDU basshysy Tedros Adhanom Gebreısýstyń aıtýynsha, kásipqoı sportshy bolýǵa mindetti emes. Lıftimen emes - satymen kóterilý, kóbirek júrip, velosıped tebý jetkilikti.
Telearnanyń habarlaýynsha, aldaǵy 27 qyrkúıek kúni Nıý-Iorkte ótetin BUU Bas Assambleıasynyń 73-sessııasynda ınfektsııalyq syrqattar boıynsha Joǵary deńgeıdegi úshinshi keńes ótetin bolady. Forým qatysýshylary álem halqynyń sporttyq belsendiligin arttyrý boıynsha DDU-nyń Jahandyq josparyn talqylaıdy.
