Qazaqstandyqtar AQSh-taǵy daýyl jaıly: Hıýstonnan uıqy qashty

ASTANA. QazAqparat - Búginge deıin Tehastaǵy daýyldan zardap shekkenderdiń sany 10 adamǵa jetip, Port Aransas, Port O'Konnor men Korpýs Krıst qalalarynyń myńdaǵan turǵyndary úılerinen qaýipsiz jerge kóshirilgen. Tabıǵat apaty saldarynan on myńdaǵan adam baspanalarynda jasyrynyp otyr.

Buryn habarlanǵandaı, sekýndyna orta eseppen 60 metr qashyqtyqqa soqqan qatty jel ǵımarattardyń qabyrǵalaryn qulatyp, úılerdiń shatyrlaryn ushyryp áketken. Meksıka shyǵanaǵynyń jaǵasyndaǵy Korpýs Krıstı qalasynda 200 myńnan astam adam elektr qýatynsyz qalǵan. Rokport qalasyndaǵy 10 myńdaı kisini qaýipsiz jerge kóshirý mindetti bolyp otyr.

BAQ-tyń aqparatyna sáıkes, keıbir aýdandarda sýdyń kóterilý deńgeıi 76 sm-ge deıin bolýy múmkin. Ulttyq daýyl ortalyǵynan habarlaǵandaı, dúısenbi kúni daýyldyń qarqyny kúsheıgen. Bul degenińiz sý tasqynynyń týyndaý qaýpi arta túsedi degen sóz.

Hıýston qazir túnniń qushaǵynda jatsa da, úreılengen adamdar uıyqtaı almaı otyr. Ásirese, otandastarymyz Tehasta shoǵyrlanǵany belgili. Qazirgi ýaqytta qalada turatyn otbasylar men stýdentter ózderiniń baspanalarynda jatyr. Sabaqtar toqtatylǵan. Olarǵa qaýipsizdik úshin úılerinde qalý týraly keńes berilgen. Qazaqstandyqtar ózgelermen birge sý tasqynynyń aıaqtalýyn kútip otyr. Otandasymyz Bulbul Qaıratqyzy qazaqstandyqtardyń synaqty qalaı ótkerip jatqany týraly áńgimelep berdi.

«Bizde bári jaqsy. Sizderge rahmet! Hıýstondamyz. Men biletin qazaqtardyń bári din aman. Biz úıde otyrmyz, syrtqa shyqpaımyz. Árıne, kóshede ne bolyp jatqanyn kórgimiz keledi, biraq bul qaýipti bolǵandyqtan, úıde qalǵanymyz abzal», - deıdi Bulbul.

Onyń aıtýynsha, dúkenderde adamdar azyq-túlikterdi kóptep satyp alǵan.

«Dúkenderde sózsiz eshteńe qalǵan joq. Jumadan bastap kerek-jaraqtardyń barlyǵyn alyp aldyq. Sý joq edi. Tústen keıin Valmartqa (eń úlken bólshek saýda jelisine) barǵanymyzda onda uzyn-sonar kezek tur eken. Jańbyrdyń astynda turýǵa týra keldi. Qudaıǵa shúkir, sý men ınternet bar. Qazaqstandaǵy týystarym qorqyp otyr, anam saǵat saıyn qońyraý shalady. Sý úıine ótip ketken qazaqtardyń baspanalary bar eken. Biraq jalpy bári jaqsy, kóbinde úıde qalýǵa tyrysamyz», - deıdi ol.

Boıjetkenniń sózine sáıkes, ol keıbir kıimderin zardap shekkenderge úlestirgen. «Az da bolsyn kómek qolyn sozýǵa tyrysamyz» deıdi ol.

Birneshe kún buryn memleket basshysy Donald Tramp Tehastaǵy tropıkalyq Harvı daýylyna baılanysty tabıǵı apattyq rejımdi jarııalady. AQSh-tyń buqaralyq aqparat quraldarynyń habarlaýynsha, sońǵy 12 jylda Qurama Shtattardaǵy mundaı daýyl bolmaǵan. Jaýǵan jańbyrdyń mólsheri de sońǵy 40 jylda tirkelmepti. Mundaı tabıǵı qubylys 1978 jyly Tehasta bolǵan eken.