Qazaqstandyqtar 30-ynshy Jazǵy Olımpıada oıyndaryna 100-den astam lıtsenzııamen qatyspaq
ASTANA. 12 naýryz. QazAqparat - Qazaqstandyqtar Londonda ótetin 30-ynshy Jazǵy Olımpıada oıyndaryna 100-den astam lıtsenzııamen qatysýdy josparlap otyr.
Bul týraly búgin elimizdiń sport salasyn damytýǵa qatysty zańnyń oryndalý barysyna baılanysty Senatta ótken májiliste Sport jáne dene shynyqtyrý agenttiginiń tóraǵasy Talǵat Ermegııaev málim etti.
Onyń sózine qaraǵanda, búgingi kúni qazaqstandyqtarda 64 lıtsenzııa bar. «Bul rette biz, ádettegideı boks, aýyr atletıka, erkin kúres, grek-rım kúresi, áıelder kúresi, dzıýdo, jeńil atletıka, velosport sııaqty sport túrlerinen eń kóp medal jınaýdy josparlap otyrmyz. 30-shy Jazǵy Olımpıada oıyndarynda sportshylarymyzdyń sátti óner kórsetýleri úshin barlyq sharttar qarastyrylǵan»,-dedi Agenttik tóraǵasy.
Onyń sózinshe, qazirgi tańda Qazaqstan quramasy Londonda ótetin 30-shy Jazǵy Olımpıada oıyndaryna qyzý daıyndalýda. Atalmysh sport básekesi bıylǵy jyldyń 27 shildesinen 12 tamyzy aralyǵynda Londonda ótedi.
Jazǵy oıyndardyń ashylýyna 136 kún qaldy. Onda barlyǵy 39 sport túri boıynsha 302 júlde sarapqa salynady.
«Osy ýaqytta 12 sport túri boıynsha lıtsenzııalyq jarystar aıaqtaldy. Ózge sport túrleri boıynsha jarystar jalǵasýda»,-dedi T. Ermegııaev.
