Qazaqstandyqtar 3 jylda monopolısterdi qansha mıllıardqa baıytty

ASTANA. QazAqparat - Qazaqstandyqtar 3 jyldyń ishinde kommýnaldyq qyzmetter úshin monopolısterge 29 mlrd teńge artyq tólegen. Bul týraly búgin Aqordada ótken QR Qaýipsizdik keńesiniń otyrysynda Bas prokýror Qaırat Qojamjarov aıtty, dep habarlaıdy QazAqparat tilshisi.

«Energeııa beretin jáne onymen jabdyqtaıtyn uıymdar kez kelgen jolmen ózderiniń shyǵystaryn arttyrady. Qyzmet qunyna syıaqy, bonýs, kredıt tólemder, issapar jáne ózge de joq shyǵyndar zańsyz qosylady. Tekserý barysynda úsh jyldyń ishinde olarǵa halyqtyń 29 mlrd teńgeni zańsyz artyǵymen tólegeni anyqtaldy», - dedi ol.

Máselen, onyń dereginshe, 2016 jyly «Alataý jaryq kompanııasy» AQ tótenshe jaǵdaı qaýpi degen jeleýmen tarıfti 1,4 mlrd teńgege arttyryp jibergen. Al «Aqtóbe JES» AQ aǵymdaǵy jyly múldem joq kredıttik mindettemesin qosyp, jylýǵa arnalǵan tarıfti kótergen. Monopolııaǵa qarsy organ bolsa olardyń múddesin qorǵap, negizi joq tarıfti qasaqana bekitken. Sonyń saldarynan óńir turǵyndary 893 mln teńge artyq bólegen. «Astanaenergosbyt» JShS energııany 2 ese arzan baǵaǵa satyp alyp, zańsyz 2,6 mlrd teńge paıda tapqan.

«Qaýipsizdik keńesi otyrysynyń qarsańynda dál osy somaǵa elorda turǵyndaryna ótemaqy tarıfi engizildi. Almaty men Qaraǵandy oblystarynda da Qaýipsizdik keńesi otyrysy qarsańynda osyndaı jaıt oryn aldy. Mundaı derekter Aqmola, Shyǵys Qazaqstan, Pavlodar oblystarynda da anyqtaldy», - dedi Bas prokýror.

Qaırat Qojamjarovtyń paıymynsha, elimizdiń Ulttyq ekonomıka mınıstrligi tarapynan jetkilikti deńgeıde baqylaý bolǵanda mundaı jaıtqa jol berilmes edi.

«Bir ǵana prokýrorlyq tekserý anyqtaǵan 29 mlrd teńge shyǵyndy úsh jyl boıy monopolııaǵa qarsy organ anyqtaı almaı keldi. Laýazymdy tulǵalarǵa qatysty joǵaryda atalǵan qyzmet babyn asyra paıdalaný jáne nemquraılylyq faktileri boıynsha biz 7 qylmystyq is qozǵadyq», - dedi ol.