Qazaqstandyqtar 3 mln. teńgeden asatyn qymbat buıymdaryn deklaratsııalaıtyn bolady
ASTANA. 4 jeltoqsan. QazAqparat -Qazaqstandyqtar 3 mln. teńgeden asatyn buıymdarynyń barlyǵyn deklaratsııalaýǵa mindetti bolady.
Bul týraly búgin Astanada tabys jáne múliktik deklaratsııa zańnamasyn jetildirý taqyrybynda ótip jatqan dóńgelek ústel barysynda QR Qarjy vıtse-mınıstri Rýslan Dálenov málim etti.
Vıtse-mınıstrdiń aıtýynsha, jańa zań jobasy aıasynda jeke tulǵalardyń mindetterine kózdeletin birqatar sharalar usynylyp otyr. Atap aıtqanda, jeke tulǵalarǵa aktıvter men mindettemeler jáne múlikter týraly aqparattardy, qolyndaǵy aqsha qarajattary, quny 3 mln. teńgeden nemese 20 myń dollardan asatyn nemese aılyq ortasha jalaqydan 160 ese asatyn kredıtorlyq jáne debıtorlyq boryshtar somasy týraly maǵlumattar berý týraly mindetter qarastyrylady.
«Budan bólek, jeke tulǵalar ózderiniń bıologııalyq aktıvteri jóninde, ózine tıesili mádenı qundylyqtary, baǵaly zattary, zergerlik buıymdary jáne asyl tastar men asyl metaldardan jasalǵan basqa da buıymdary, qundy óner týyndylary, antıkvarıattary jáne quny 3 mln. teńgeden nemese 20 myń dollardan asatyn basqa da múlikteri týraly málimetterdi deklaratsııalarynda kórsetýge mindetti bolady. Al bank depozıtteri men banktegi kredıtteri týraly málimetterge kelsek, onda jeke tulǵalar tek shet elderdegi bankter boıynsha deklaratsııalar usynady. Qazaqstandyq bankterdegi aqparattardy salyq organdary kelisimsharttar boıynsha ózderi de ala alady», - deıdi R. Dálenov.
Eske sala keteıik, jeke tulǵalarǵa arnalǵan jalpylama deklaratsııalaýdy engizý 2015 jyl men 2017 jyl aralyǵyna josparlanyp otyr.
