Qazaqstandyqtar 25 qazanda kúnniń tutylý qubylysyn kóre alady

ASTANA. QazAqparat –25 qazanda kúnniń jartylaı tutylý qubylysy Qazaqstannyń barlyq aýmaǵynda kórinedi, dep habarlaıdy QazAqparat tilshisi.

«Aı kúndi 60-80% jaýyp turǵan qazirgi kún tutylýy 2004 jyldyń 14 qazanyndaǵy kúnniń jartylaı tutylýynyń qaıtalanýy. Aı men Kún tutylýynyń aldyńǵy retpen qaıtalanatyn bul ýaqyt aralyǵy (shamamen 18 jyl) astronomııada «saros» dep atalady. Sondyqtan saros arqyly kelesi tutylý 2040 jyldyń 4 qarashasynda qaıtalanady», - deıdi V.G. Fesenkova atyndaǵy astrofızıka ınstıtýty dırektorynyń orynbasary Rashıt Valıýllın.

Instıtýt mamandary elimizdiń birneshe óńirine kúnniń tutylý ýaqytyn eseptep shyǵardy. Kún tutylýynyń maksımaldy fazasy Astanada baıqalady. Elordada kún tutylý 16:06-da bastalyp, maksımaldy frazany (83%) elorda turǵyndary saǵat 17:17-de kóre alady. Almatyda kún tutylýynyń bastalýy jergilikti ýaqyt boıynsha saǵat 16:26-da, 17:35-te maksımaldy fazasy bastalady - 76%, Petropavlda (80%) – saǵat 17:08-de, Pavlodarda (79%) – 17:18-de, Oralda (71%) – saǵat 16:00-de, Atyraýda (69%) - 16:07-de, Shymkentte (69%) - 17:32-de.

«Bul tańǵajaıyp astronomııalyq qubylysty kórý qabiletimizge zııan keltirmeı baqylaý úshin saqtyq sharalaryn saqtaý qajet. Kún tutylýyn ekran proektsııasy arqyly baqylaǵan durys. Sonymen qatar kúńgirt súzgi nemese dánekerleýshi kózildirigi arqyly kúnge tikeleı qaraýǵa bolady»,- dedi R. Valıýllın.

Astrologtardyń «qara kúnge» qatysty boljamdaryna keletin bolsaq, kún tutylýy árqashan jańa nárseniń bastalýyn boljaıdy. Bul bastamalardyń energııasy. Bul kún tutylýy emotsııalarǵa, agressııaǵa kúshti áser etýi múmkin. Boljaýshylar kún tutylǵanǵa deıin jáne odan keıin 3 kún buryn asa mańyzdy sharýalardy qolǵa almaýǵa, josparlamaýǵa úndeıdi.

Avtory: Sara Qabıqyzy