Qazaqstandyqtar 200 myńnan astam eski kólikti ýtılızatsııalaýǵa ótkizgen
NUR-SULTAN. QazAqparat – Eski kólikti kádege jaratý baǵdarlamasy bastalǵannan beri qazaqstandyqtar 200 104 avtokólik ótkizgen. Bul týraly QazAqparat Óndirýshilerdiń keńesıtilgen mindettemeleri Operatorynyń baspasóz qyzmetine silteme jasap habarlaıdy.
Uıymnyń málimeti boıynsha, eski kólik ótkizý kórsetkishi boıynsha Shymkent qalasy alda tur. Bul qalada 38 496 kólik kádege jaratýǵa tapsyrylǵan. Odan keıingi oryndarda Almaty, Taraz, Qaraǵandy jáne Pavlodar qalalary tur. 2021 jylǵy segiz aıdyń qorytyndysy boıynsha búkil óńirlerden 25 958 jeńil jáne 9 219 avtobýs pen júk kóligi qabyldap alynǵan.
«Jeńildik sertıfıkatyn usynatyn baǵdarlama boıynsha 2315 aýyl sharýashylyǵy tehnıkasy qabyldandy. Onyń ishinde 1 830 traktor jáne 485 kombaın bar. Baǵdarlama bastalǵan 2016 jyldan beri eski kóligin ótkizgenderge 54 700 jeńildik sertıfıkaty berildi. Ol sertıfıkattar Qazaqstanda shyǵarylǵan 29 200 avtomobıl satyp alýǵa paıdalanyldy», - dep jazady ÓKM Opeatorynyń baspaóz qyzmeti.
Eskirgen kóligin ótkizgisi kelgender uıymnyń saıtyna (recycle.kz) kirip, elektrondyq kezekke turýy kerek.
2020 jyldan bastap qabyldanatyn kóliktiń ótemin aılyq eseptik kórsetkishpen esepteý júıesi engizilgen bolatyn.
Ol qoldanystan shyqqan kólik M1 sanatyndaǵy bolsa, 210 myń teńge, (72 AEK), M2 jáne N1 sanatyna jatsa, 420 myń teńge (144 AEK), M3 sanatyna kirse, 630 myń teńge (216 AEK) teńge tólenedi.
Byltyrǵy qarasha aıynan beri ÓKM Operatory qoldanystan shyqqan aýyl sharýashylyǵy tehnıkasyn qabyldaı bastady. Tapsyrylǵan eski kombaındar men traktorlardyń ornyna jeńildik sertıfıkattary beriledi. Sertıfıkat quny olardyń túri men jınaqtalýyna baılanysty 560 myńnan 2 mıllıon teńgege deıin ózgeredi.
