Qazaqstandyqtar 17 myń kólikti sheteldikterge «tegin» bere salǵan
ASTANA. QazAqparat - 1993 jyldan beri Qazaqstanda urlanǵan 60 myń kólik shekara asyp, álemniń túkpir-túkpirine tarap ketken. Osy ýaqytqa deıin 43 myń kólik qaıtaryldy. Qalǵan 17 myń kólik áli tabylmaı jatyr, dep habarlaıdy QazAqparat tilshisi.
QR Іshki ister mınıstriniń birinshi orynbasary Marat Demeýovtiń aıtýynsha, qazirgi kezde ol kólikterdi qaıtarǵan tıimsiz. Sebebi biraz ýaqyt ótip ketti. Urlanǵan kólikter tozdy. Aıyppul turaǵynan alý úshin qyrýar aqshany da tóleýge týra keledi. Sol sebepti kólik ıeleri temir tulparlaryn izdeýdi qoıdy. Al TMD boıynsha kólikterdi urlaýǵa qarsy kúres týraly kelisimniń arqasynda qoldy bolǵan mashınalardy jyldam qaıtarýǵa múmkindik bar.
«Máselen, biz óz jerimizde urlanǵan kólikti anyqtasaq, 20 kúnniń ishinde kórshi elderdiń tıisti organdaryna habar beremiz. Olardyń tergeý qyzmeti 30 kúnniń ishinde dál sol kólikterdiń urlanǵanyn rastaýy tıis. Bir aıdyń ishinde jaýap kelmese, biz ol kólikti aýktsıon arqyly sata alamyz. Qazirgi kezde Qazaqstanda urlanǵan 200 kólik TMD aımaǵynda júr. Sonyń 66-syn qaıtardyq», - dedi Medeýov QazAqparat tilshisine bergen suhbatynda.
Aıta keteıik, búgin senatorlar TMD elderiniń kólikterdi urlaýǵa qarsy kúres kelisimin ratıfıkatsııalaý týraly zań jobasyn talqyǵa saldy. Atalǵan qujatty QR Іshki ister mınıstriniń birinshi orynbasary Marat Demeýov tanystardy. Onyń aıtýynsha, 2005 jyly on eldiń basshylary kelisimge qol qoıǵan bolatyn. Bertin kele, Ýkraına men Grýzııa kelisimnen bas tarty. Osy ýaqytqa deıin ony 6 memleket ratıfıkatsııalady. Endi, Qazaqstan, Tájikstan men Ázerbaıjan qaldy.
