Qazaqstandyqtar 163 mln teńgeniń eski banknotyn aıyrbastady
ALMATY. QazAqparat - Ulttyq banki 12 maýsymnan bastap 2006 jyly jáne odan keıin shyqqan banknottardy merzimsiz aıyrbastaý kezeńi kúshine engenin eske salady. Osy ýaqyt aralyǵynda qazaqstandyqtar jalpy mólsheri 163 mln teńgege 66 403 banknot aıyrbastap aldy, dep habarlaıdy QazAqparat tilshisi.
Banknottardy aýystyrýǵa qatysty ótinishtiń basym bóligi Almaty (16,6%), Nur-Sultan (9,7%) qalasy men Qaraǵandy oblysy (8,8%) turǵyndarynan tústi. Aıyrbastaýǵa qabyldanǵan aqshanyń basym bóligi – nomınaly 500 teńgelik banknot (47,1%).
Aıta keteıik, aınalymnan shyqqan 2006 jylǵy úlgidegi nomınaly 500, 1000, 2000, 5000 jáne 10 000 teńgelik banknottardy shekti merzimine qaramastan Qazaqstan Ulttyq bankiniń aýmaqtyq fılıaldarynda aıyrbastaýǵa bolady.
Jańa banknot shyqqan jaǵdaıda eski úlgisi 12 aı boıy qoldanysta qatar júredi. Bir jyl boıy eski banknot ta, jańa banknot ta zańdy tólem quraly bolyp sanalady jáne olar barlyq tólem túri boıynsha qabyldanýǵa mindetti.
Qandaı da bir banknot aınalymnan shyqqan jaǵdaıda 3 jyl ishinde ony QUB fılıaldarynan da, ekinshi deńgeıli bankter bólimshesinen nemese «Qazposhtadan» aıyrbastap alýǵa bolady. Aınalymnan shyǵarylǵan banknottar 3 jyl ótken soń da Ulttyq bank fılıaldarynda merzimsiz aıyrbastala beredi.
