Qazaqstandyqtar 1 myńnan astam qarý-jaraqty polıtsııaǵa tapsyrǵan

NUR-SULTAN. QazAqparat – QR Іshki ister mınıstrligi qazaqstandyqtardan qarý-jaraq pen oq-dári satyp alyp jatyr. Bul týraly atalǵan vedomstvo ókili Shuǵyla Turlybek málim etti, dep habarlaıdy QazAqparat tilshisi.

«Іshki ister mınıstrligi halyqtan zańsyz saqtalǵan atys qarýyn, oq-dári men jarylǵysh zattardy satyp alý boıynsha respýblıkalyq aktsııany jalǵastyryp jatyr. Qarý-jaraqty óz erkimen tapsyrǵany úshin qarýdyń jaı-kúıine qaraı árqaısyna 10-nan 100-ge deıingi aılyq eseptik kórsetkish kóleminde tólem kózdelgen. Qazirgi tańda polıtsııaǵa erikti túrde 1093 atys qarýy tapsyryldy», - dedi Shuǵyla Turlybek mınıstrlikte ótken baspasóz máslıhatynda.

Osy oraıda mınıstrlik zańsyz saqtalǵan qarý-jaraq úshin jaýapkershilik baryn eske saldy.

«Tapsyrylǵan qarý-jaraqtyń ishinde 1 avtomat, 167 oıyq uzyn uńǵyly, 4 oıyq qysqa uńǵyly, 910 tegis uńǵyly, 11 travmatıkalyq, 5 jarylǵysh qurylǵy bar. Odan bólek, 8 myńnan astam patron alyndy. Esterińizge sala keteıik, qarý-jaraq zattaryn qabyldaý árbir aýmaqtyq polıtsııa organynda júrgiziledi», - deıdi ol.

Buǵan deıin mınıstrlik ókili pasportqa nelikten chıp japsyrylatynyn túsindirip ótti.