Qazaqstandyq jýrnalıster koronavırýsqa qarsy vaktsına saldyryp jatyr
NUR-SULTAN. QazAqparat – Tanymal qazaqstandyq jýrnalıster koronavırýsqa qarsy vaktsına alýdy jalǵastyrýda, dep habarlaıdy QazAqparat.
Telejúrgizýshi, bıznesvýmen Dınara Sátjan keshe reseılik Spýtnık-V vaktsınasynyń birinshi komponentin saldyrdy.
«Jaǵdaıym jaqsy. Dene qyzýy kóterilgen joq. Esh jerim aýyrǵan joq. Vaktsınadan keıin jumysqa kiristim, tipti vaktsına alǵanymdy umytyp ta kettim. Men aǵzamdaǵy antıdeneler taýsylǵandyqtan, vaktsına salǵyzdym. Óıtkeni, qaıtadan aýyrǵym kelmeıdi. Adamzat oba, tyrysqaq, qara sheshek, súzek, týberkýlez aýrýlaryn qalaı jeńdi dep oılaısyzdar? Koronavırýs ta – jappaı vaktsınalaýdy qarý etýge bolatyn birinshi jaý emes. Menińshe, sekemshil adamdar tuıyq sheńberge túsedi. Olar neǵurlym kóp úreılense, soǵurlym álsiz bolady. Jeliden 5G týraly aqparat pen ózderi sekildi kúdikshil adamdar jazatyn mánsiz áńgimelerdi izdeıdi. Qalypty ómir saltyna oralǵysy keletinder, alǵashynda «qarsy» bolyp júrgender de vaktsına jasatady», - dep jazdy Dınara Sátjan óziniń Instagram paraqshasynda.
Al jýrnalıst Azamat Erǵalı QAZVAC vaktsınasynyń ekinshi dozasyn 21 kúnnen keıin saldyrǵan.
«QAZVAC vaktsınasynyń ekinshi dozasyn alý úshin Nur-Sultan qalasynyń 9-emhanasyna keldim. Adamdar az emes. Emhananyń medıtsınalyq qyzmetkerleri shıraq jumys istep jatyr. Turǵyndardyń barlyǵy tirkeledi jáne qandaı vaktsınany tańdaǵanyna baılanysty ártúrli kabınetterge jiberiledi. QAZVAC nemese Spýtnıktiń birin saldyrýǵa bolady. Ekpe protsesi jolǵa qoıylǵan, esh qarbalas joq. Sary bahılalar berdi», - dep jazdy Azamat Erǵalı Facebook paraqshasynda.
Sonymen birge jýrnalıst Dına Tólepbergen jaqynda Spýtnık-V vaktsınasynyń ekinshi komponentin alǵan.
«Búgin ekinshisin (vaktsına – red.) aldym. 45 mınýt ótti. Osy postty jazyp otyrǵanyma qaraǵanda, shúkir, aıaq-qol dirildep jatqan joq, sanam oıaý. Ary qaraı qalaı bolaryn bilmeımin. Biraq jaqsylyqqa senemin. Spýtnık V alǵashqy komponentin saldyrǵan soń, 7 kún boıy qyzýym kóterilip edi. Tipti 5-6 kúnderi tura almaı, jatyp qaldym. Ekinshi komponenttiń áseri jeńildeý bolsa ıgi. Koronavırýs saldarynan eń jaqyn adamdaryńdy joǵaltyp alǵannan keıin, kúdiktene, seskene bastaıdy ekensiń. Aman bolaıyq, bar bolaıyq», - deıdi D. Tólepbergen .
Aıta keteıik, Qazaqstanda koronavırýsqa qarsy vaktsına alǵandar sany 2 mln-ǵa jýyqtady.
