Qazaqstandyq jýrnalıster fýtzaldan ózara myqtyny anyqtady
QYZYLORDA. QazAqparat - Elimizdiń birqatar óńirinen kelgen jýrnalıster Qyzylorda qalasynyń 200 jyldyǵyna oraı fýtzaldan oblys ákimi taǵaıyndaǵan júldeni sarapqa saldy. Atalmysh týrnırde barlyǵy 12 komanda baq synady, dep habarlaıdy QazAqparat tilshisi.
Jarystyń ashylý saltanatyna oblystyq máslıhat hatshysy Naýryzbaı Baıqadamov, aımaq basshysynyń orynbasary Rýslan Rústemov jáne óńirlik ishki saıasat basqarmasynyń basshysy Talǵat Mahanov qatysyp, komandalarǵa sáttilik tiledi.
Alǵash ret uıymdastyrylǵan jarysqa Astana, Almaty, Shymkent qalalary men Batys Qazaqstan, Túrkistan, Jambyl, Qyzylorda oblystarynan komandalar qatysty. Olardyń arasynda budan buryn elimizdiń ár óńirinde ótkizilip júrgen jarystarda jeńimpaz atanǵan ujymdar bar. Sondyqtan atalmysh básekeniń árbir oıyny alań ústindegi talasqa toly boldy.
Týrnır shymyldyǵy «Taraz press» jáne «Qyzylorda tv» komandalary arasyndaǵy oıynmen túrildi. Qos komanda joǵary sheberlik deńgeılerin kórsete bildi. Kezdesý 3:3 esebimen aıaqtaldy. Budan keıingi barlyq matchtar osyndaı qarqyndy qımylmen órbip jatty.
Jartylaı fınal oıyndary óte tartysty boldy. Oǵan shyqqan árbir komanda ózderiniń sheberligin dáleldeı tústi. Keıbir oıynda jeńimpaz penaltı tebýden anyqtaldy. Týrnır barysynda bir topta synǵa túsken Jambyl oblysynyń «Taraz press» komandasy men shymkenttik «Ernııaz medıa» aqtyq saıysta taǵy kezdesti. Oıynnyń negizgi kezeńi 1:1 esebimen teń aıaqtalyp, týrnır jeńimpazy penaltı nátıjesinde belgili boldy. Osylaısha, shymkenttik tilshiler «altynǵa» qol jetkizdi. Úshinshi oryn «Jambyl medıany» jeńgen astanalyq «Habar» telearnasynyń jigitterine buıyrdy.
Bas júldege 600 myń teńge berilse, odan keıingi oryndaǵy komandalar 400 jáne 200 myń teńgeniń aqshalaı syılyǵyna ıe boldy.
