Qazaqstandyq jýrnalıst «Orel ı Reshka» baǵdarlamasyn júrgizdi

NUR-SULTAN. QazAqparat - Qazaqstandyq Danııar Qojan «Orel ı Reshka» baǵdarlamasynyń Nıý-Iorktegi shyǵarylymyn júrgizdi, dep habarlaıdy QazAqparat.

Túsirilim jumystary týraly Danııar QazAqparat tilshisine suhbat berdi.

«12 sáýir kúni Instagram paraqshama «Orel ı Reshka» baǵdarlamasynyń redaktsııasy habarlasty. Olar meniń Nıý-Iorktegi qyzyqty jazbalarymdy kórgen. Mundaǵy jaǵdaı «óte qıyn» degendi estip, qalanyń qazirgi ómirin túsirip jiberýdi surady. Túsirilimde Nıý-Iorktiń tanymal kóshelerin, dárigerlerdiń jumysyn, ýaqytsha qurylǵan aýrýhanalardy kórsetýge tyrystym», - deıdi Danııar.

Danııar Qojan Almaty qalasynda týǵan, Qazaq gýmanıtarlyq zań ýnıversıtetin «Quqyqtaný» mamandyǵy boıynsha bitirgen. Qazir Nıý-Iorkte «Ballon Stoll Bader» zańgerlik kompanııasynyń pıar-menedjeri bolyp jumys isteıdi.

«Ózim de saıahattaǵandy jaqsy kóremin, ázirge 15 memlekette boldym. Amerıkaǵa da anam ekeýmiz kelip, shtattardy aralaǵanbyz. Osylaısha, zańgerlik kompanııadan usynys túsip, pıar-menedjer qyzmetine qabyldandym», - dep túsindirdi ol.

Danııar buǵan deıin de qazaqstandyq telearnalarda jýrnalıst, prodıýser bolyp jumys istegen.

«Ómirimdegi mańyzdy materıaldardyń biri - tanymal boksshy Maık Taısonmen eksklıýzıvti ıntervıý der edim. «Orel ı Reshka» baǵdarlamasyn túsirgende de ózim operator, ózim montajer boldym. Onyń mátinin jazýǵa qazaqstandyq jýrnalıst Anar Úmbetova kómektesti. Qazir Anar da Amerıkada turady. Nátıjesinde Nıý-Iork týraly shyǵarylymǵa óte jaqsy lebizder kelip jatyr. Baǵdarlamanyń bas prodıýseri Elena Sınelnıkova habarlasyp, alǵys bildirdi. Endi Nıý-Iork týraly kelesi shyǵarylymdy ázilep jatyrmyz. Onda halyqtyń koronavırýs ınfektsııasynan jazylǵanyn kórseterimizge úmittenemin», - deıdi D. Qojan.