Qazaqstandyq jýrnalıst Grýzııada kisi qolynan qaza tapty

ASTANA. QazAqparat – Qazaqstan azamaty Janbota Tólegen Grýzııada kisi qolynan qaza tapty. Bul aqparatty elimizdiń Syrtqy ister mınıstrliginiń resmı ókili Aıbek Smadııarov rastady, dep habarlaıdy QazAqparat tilshisi.

«Qazaqstan azamatynyń Grýzııada kisi qolynan qaza tapqany ras. Osy jyldyń 24 mamyrynda Qazaqstannyń Tbılısı qalasyndaǵy Elshiligine Telavı qalasynyń quqyq qorǵaý organdarynan Qazaqstan azamatynyń kisi qolynan qaza tapqany týraly aqparat tústi. Kúdikti adam ustaldy, tergeý júrip jatyr. Tergeý múddesine oraı óltirý mán-jaıy men kúdikti jaıly málimetter jarııalanbaıdy», - dedi Aıbek Smadııarov.

Onyń atap ótýinshe, Qazaqstan azamaty Grýzııaǵa jeke saparmen barǵan jáne oqıǵanyń kásibı qyzmetine qatysy joq.

«Qaıtys bolǵan azamattyń denesi Otanyna jetkizilip, 2 maýsymda jer qoınyna berildi. Grýzııadaǵy Qazaqstan konsýly jergilikti quqyq qorǵaý organdarymen únemi baılanysta jáne bul máseleni baqylaýynda ustap otyr», - dedi resmı ókil.