Qazaqstandyq júrgizýshilerge jańa medıtsınalyq qobdısha satyp alý mindet emes - QR Densaýlyq saqtaý jáne áleýmettik damý mınıstrligi
ASTANA. QazAqparat - Qazaqstandyqtarǵa jańa avtomobıldegi alǵashqy medıtsınalyq kómek qobdıshasyn satyp alý qajet emes, onyń quramyn avtokólik ıeleri óz betimen jańarta alady, dep habarlaıdy QR DSÁDM resmı saıty.
«Jańa avtomobıldegi alǵashqy medıtsınalyq kómek qobdıshasyn alý boıynsha mindetti talaptar joq, qazaqstandyqtar olardyń quramyn QR Densaýlyq saqtaý jáne áleýmettik damý mınıstriniń buıryǵyna sáıkes óz betimen jańarta alady», delingen habarlamada.
2014 jylǵy 18 qarashada «Avtomobıldegi alǵashqy medıtsınalyq kómek qobdıshasynyń dárilik zattary men medıtsınalyq maqsattaǵy buıymdarynyń tizbesin bekitý týraly» Qazaqstan Respýblıkasy Densaýlyq saqtaý mınıstriniń 2014 jylǵy 2 shildedegi №368 buıryǵyna ózgerister engizilgenin buryn habarlaǵanbyz. Avtomobıldegi alǵashqy medıtsınalyq kómek qobdıshasynyń jańa quramy týraly buıryq 2015 jylǵy 11 qańtardan kúshine engen.
Avtomobıldegi alǵashqy medıtsınalyq kómek qobdıshasynyń quramy kólik quraly jaǵdaıynda dárilik zattardy saqtaýda temperatýralyq rejımdi saqtaý múmkindigi joqtyǵynan ózgertildi. Sýtegi totyǵynyń 3% eritindisinen basqa barlyq dárilik zattar alyp tastaldy. Bul quram eýropalyq elderdiń normalaryna sáıkes ázirlendi jáne Reseı men Belarýstegi avtomobıldegi alǵashqy medıtsınalyq kómek qobdıshasynyń quramyna saı.
Avtomobıldegi alǵashqy medıtsınalyq kómek qobdıshasynyń jańa quramyna kirgender: sýtegi totyǵynyń 3% eritindisi (1 flakon), zararsyzdandyrylǵan dáke bınti 5m *10 sm (1 dana), zararsyzdandyrylmaǵan dáke bınti 5m *10 sm (1 dana), zararsyzdandyrylmaǵan dáke bınti 7m *14 sm (1 dana), zararsyzdandyrylǵan medıtsınalyq dáke salfetkalar (1 dana), zararsyzdandyrylǵan tańý paketi (1 dana), zararsyzdandyrylǵan medıtsınalyq gıgroskopııalyq maqta 50 g. (1 dana), qan toqtatqysh jgýt (1 dana), bakterıtsıdti leıkoplastyr (5 dana), medıtsınalyq leıkoplastyr (1 dana), elastıkalyq tútiksheli bınt № 1, 3, 6 (bir birden), zararsyzdandyrylmaǵan medıtsınalyq qolǵaptar (1 jup), doǵal ushty qaıshylar (1 dana).
