Qazaqstandyq júrgizýshiler jol qozǵalysy erejesin buzǵany úshin ınternet arqyly 1,2 mln. teńgeden astam aıyppul tóledi

dep habarlady QR Baılanys jáne aqparat mınıstrliginiń baspasóz qyzmetinen.

«Elektrondyq úkimettiń» jol qozǵalysy erejesin buzǵany úshin jol polıtsııasy qyzmetkerleri belgilegen aıyppuldy tóleý qyzmeti ótken jyldyń qarasha aıynan bastap elimizdiń barlyq aımaǵynyń turǵyndary úshin qoljetimdi. Búgingi kúni tólemniń atalǵan túri boıynsha www.egov.kz portaly arqyly bıýdjetke 1 250 000 astam teńge tústi», - delingen habarlamada.

Aıyppuldy «onlaın» tártibinde tóleý úshin júrgizýshi kýáligi ne bolmasa ákimshilik buzýshylyq týraly hattama málimetterin (blank serııasy, nómiri, jol qozǵalysy erejesin buzǵan kúni) www.egov.kz portalyndaǵy arnaıy jolaqta kórsetý qajet.

Aıyppuldy Visa nemese Mastercard tólem kartochkalarynyń kómegimen tóleýge bolady. Elektrondyq tólemniń tıimdiligi, birinshi kezekte, aıyppuldyń ótelgeni týraly aqparat birden ІІM Jol qozǵalysy erejesin buzý týraly ortalyqtandyrylǵan derekter qoryna kelip túsedi. Osydan keıin aıyppul ótelgen bolyp esepteledi.

Aıyppuldy ótegennen keıin qoldanýshyǵa elektrondyq chek beriledi. Ol qoldanýshynyń elektrondyq úkimet portalyndaǵy jeke kabınetinde saqtalady.

Qajet bolǵan jaǵdaıda ne bolmasa buryn alyp qoıǵan júrgizýshi kýáligin qaıtaryp alý úshin ony basyp shyǵaryp, ishki ister organdarynyń jol polıtsııasy bólimine kórsete alasyz.

Vedomstvonyń atap ótýinshe, jaqyn kúnderi «elektrondyq úkimet» portalynda beınebaqylaý júıelerinde tirkelgen jol qozǵalysy erejesin buzǵany úshin ákimshilik aıyppuldardy «onlaın» tóleý qyzmeti usynylady.