Qazaqstandyq jup tuńǵysh ret Rolan Garros týrnıriniń fınalyna shyqty
NUR-SULTAN. QazAqparat – Qazaqstandyqtar Aleksandr Býblık pen Andreı Golýbev juptyq synda Rolan Garros týrnıriniń fınalyna shyqty, dep habarlaıdy QazAqparat tilshisi.
Qazaqstandyq jup jartylaı fınalda ıspanııalyqtar Pablo Andýhar – Pedro Martınespen kúsh synasty.
Sporttyq joldarynda 33 jastaǵy A.Golýbev pen odan on jas kishi A.Býblık buǵan deıin «Úlken dýlyǵa» týrnırlerinde juptyq synda osymen ekinshi ret jartylaı fınalda baq synady.
Jeti jyl buryn A.Golýbev aýstralııalyq Sem Grotpen birge Rolan Garros týrnıriniń jartylaı fınalyna deıin jetip, bolashaq jeńimpazdar Jıýlen Benneto men Edýard Roje-Vasslenge 6:3, 3:6, 4:6 esebimen ese jiberdi.
A.Býblık taǵy bir qazaqstandyq Mıhaıl Kýkýshkınmen birge 2020 jylǵy Aýstralııa ashyq chempıonatynyń jartylaı fınalynda bolashaq chempıondar, amerıkalyq Radjıv Ram men ulybrıtanııalyq Djo Solsberıden 6:4, 3:6, 4:6 esebimen utylyp qalǵan edi.
Bul joly ıspanııalyq jup matchty qarqyndy bastap, birinshi partııada bet qaratqan joq – 6:1.
Ekinshi sette esep 4:4 bolǵan mezette qazaqstandyqtar breık jasaı bildi. Sosyn A.Býblık dopty óte sátti berdi – 6:4.
Úshinshi, sheshýshi partııada esep 3:3 bolǵanda, qazaqstandyq jup breık jasady. Aqyry A.Golýbev matchqa dop bergende, qazaqstandyqtar jeńisti julyp aldy – 6:4.
Tartysty báseke 1 saǵat 44 mınýtqa sozyldy.
Qazaqstandyqtar fınalda Frantsııa ashyq chempıonatynyń 2-raketkalary, kolýmbııalyqtar Hýan-Sebastıan Kabal – Robert Farah nemese kort ıeleri Per-ıÝg Erber – Nıkolıa Maıý juptarynyń qaı jeńgenimen bas júldeni sarapqa salady.
Eske sala keteıik, budan buryn Tımofeı Skatovtyń Almaty týrnıriniń shırek fınalyna shyqqanyn, Elena Rybakınanyń juptyq synda Rolan Garros jarysynyń jartylaı fınalyna óte almaǵanyn jazǵan bolatynbyz.
Sondaı-aq qazaqstandyq tennısshi Slovakııadaǵy týrnırdiń shırek fınalyna shyqty.
Dmıtrıı Popko Almaty týrnıriniń shırek fınalyna ótti.
