Qazaqstandyq jumysshylarǵa ereýilderden aýlaq júrýdyń qyr-syry úıretiledi
ASTANA. QazAqparat - Qazaqstandyq jumysshylardy eńbek problemalaryn ereýilsiz sheshýge úıretý sharalary júrgiziledi. Bul týraly búgin Ortalyq kommýnıkatsııalar qyzmetindegi brıfıngte Densaýlyq saqtaý jáne áleýmettik damý mınıstrligi Eńbek, áleýmettik qorǵaý jáne kóshi-qon komıtetiniń tóraǵasy Aqmadı Sarbasov málim etti.
Atap aıtqanda, atalǵan vedomstvo Ulttyq kásipkerler palatasymen jáne Kásipodaqtar federatsııasymen birlese otyryp, jumysshylardy eńbek zańnamasynyń negizinde quqyqtyq jappaı oqytý sharalaryn uıymdastyrýdy jalǵastyrmaq. «Quqyqtyq jappaı oqytý arqyly biz eńbek qaqtyǵystary salasyndaǵy áleýetti táýekelderdi tómendetpekpiz. Ótken eki jylmen salystyrǵanda ereýil trendiniń tómendeýin baıqap otyrmyz», - dedi A. Sarbasov.
