Qazaqstandyq juldyzdar qaıda jáne qalaı demalyp jatyr? (FOTO)
ASTANA. QazAqparat - Shildeniń orta kezinde, ıaǵnı jazdyń eń qyzǵan shaǵynda qazaqstandyqtardyń kóbisi demalys oryndarynan oralyp jatsa, keıbiri ózderiniń eńbek demalysyn ótkizetin jerlerdi josparlap jatyr.
Atap aıtqanda, jyldyń osy mezgilinde qazaqstandyq shoý-bıznestiń juldyzdary Instagram jelisine ózderiniń demalystaryndaǵy qyzyqty sátterin salyp, bólisýde. Osy oraıda «QazAqparat» HAA óziniń oqyrmandaryna elimizdiń birqatar tanymal adamdary demalystaryn qaı jerde jáne qalaı ótkizip jatqandyǵy jaıynda málimetterdi usynyp otyr. Tanymal ánshi, «MýzArt» tobynyń múshesi Meırambek Bespaevtyń Instagram jelisine salǵan fotosýretterine qaraǵanda, qazirgi ýaqytta óziniń demalysyn otbasymen Eýropada ótkizip jatyr. Olar Parıjde bolyp, qazirgi kezde Mılannyń sáýlettik ónerin tamashalap júrgen kórinedi. Budan bólek, tanymal «Jaýjúrek myń bala» otandyq fılmine túsken Álııa Ánýarbek (Telebarısova) óziniń shárbat aıynda Frantsııa astanasynda bolǵan kórinedi. Ol óziniń bıyl qosylǵan kúıeýimen jáne dostarymen osynyń aldynda Kanar araldarynda birneshe kún ýaqytyn ótkizgen. Eýropalyq demalysty otbasymen ánshi Búrkit te tańdaǵan syńaıly. Olar birshama ýaqyt Barselonada aıaldaǵannan keıin, Tenerıfede kúnge kúıýge attanǵan eken. Qazaqstandyq estrada juldyzy Roza Rymbaeva otandyq demalys oryndarynda bolǵandy qalaıdy. Jaqyn arada ol Qatonqaraǵaıǵa jáne Alakólge barýdy josparlap otyr. Sonymen qatar bıylǵy jyly tanymal aıtysker aqyn Aınur Tursynbaeva da otandyq kýrorttarǵa barýǵa sheshken. Osy oraıda ol demalý úshin óziniń dostarynan qazaqstandyq kýrorttardyń birine barýǵa keńes berýdi suraǵan eken. Maqpal Isabekova «Sezemin» atty jańa beınebaıany aıasyndaǵy jumystardan keıin Izraılge baǵyt alǵan. Birneshe kún boıy Jerorta teńiziniń jaǵalaýynda aıaldaǵannan keıin, Taıaý Shyǵystaǵy jaǵdaılarǵa baılanysty shuǵyl túrde elge oralýǵa májbúr bolǵan. Tanymal qazaqstandyq dızaıner Sáken Jaqsybaev óziniń jazǵy demalysyn Barselonanyń kórikti jerlerimen tanysýǵa arnady. Qazaqstanǵa keri qaıtar jolda ol Ystambulǵa atbasyn burǵan. Osy jaıynda Instagram-da salynǵan sýretterden baıqaýǵa bolady. Belgili telejúrgizýshi ári prodıýser Baıan Esentaeva birneshe kúnin demalysqa arnaǵan. Ol otbasymen birge Túrkııada qysqa merzimdi demalys ótkizgen eken. Osy elde qazirgi kezde Dılnaz Ahmadıeva da demalyp júrgen kórinedi. KVN juldyzy, sondaı-aq tanymal shoýmen Nurlan Qoıanbaev bıylǵy jyly «eki qoıandy bir oqpen atýǵa» bel býǵan kórinedi. Ol Amerıkadaǵy demalysymen qatar, bir mezgilde aǵylshyn tilin tereńirek meńgerýdi jón dep sanaǵan. «A-Stýdıo» tobynyń prodıýseri ári múshesi Baıǵalı Serkebaev óziniń týrnesin Shveıtsarııaǵa saparynan bastady. Ol birneshe kúnnen beri Montre kýrorttyq qalasynda demalyp jatyr.
