Qazaqstandyq JOO Ózbekstannyń mektep túlekterine grant bóldi

NUR-SULTAN. QazAqparat – Qazaq memlekettik zań ýnıversıteti Ózbekstannyń orta mektepti bitirgen 10 túlegine grant bóledi, dep habarlaıdy QazAqparat tilshisi atalǵan JOO-ǵa silteme jasap.

«QazMZÝ basqarma tóraǵasy Talǵat Nárikbaev Qazaq memlekettik zań ýnıversıtetinde Ózbekstannyń orta mektep túlekterine bilim alýǵa jáne jatyn orynǵa 10 granttyń bólinetindigin jarııa etti. Ol bul jaıynda Scopus Award 2019 syılyǵyn tabystaý sharasy aıasynda Ózbekstan Premer-mınıstriniń orynbasary A.Abdýhakımov pen Ózbekstannyń Halyqqa bilim berý mınıstri Sh.Shermatovpen kezdesýinde aıtty», - dep atap ótedi ýnıversıtetten.

Talǵat Nárikbaev Tashkentke sapary aıasynda Ózbekstan Ádilet mınıstriniń orynbasary – Tashkent memlekettik zań ýnıversıtetiniń rektory Rahım Hakımovpen yntymaqtastyq týraly memorandýmǵa qol qoıdy.

Esterińizge sala ketsek, QR Tuńǵysh Prezıdenti - Elbasy Nursultan Nazarbaev Tashkentte Ortalyq Azııa Memleket basshylarynyń Konsýltatıvtik kezdesýinde Qazaqstannyń eń úzdik joǵary oqý oryndarynda bilim alý quqyǵyn bere otyryp, óńirdegi ár memleketke 10 grantttan bólýdi usynǵan edi.