Qazaqstandyq JOO-lardy úlken ózgeris kútip tur - Saǵadıev
ASTANA. QazAqparat - 2018 jyly qazaqstandyq joǵary oqý oryndarynyń mamandyqtar boıynsha biryńǵaı reıtıngi jasalady, dep habarlaıdy QazAqparat tilshisi.
Bul týraly QR Bilim jáne ǵylym mınıstri Erlan Saǵadıev Astanada ótken "Úzdik JOO oqytýshysy - 2017" marapattaý keshinde málim etti.
Mınıstr 2018 jyldyń elimizdegi joǵary bilim berý júıesi úshin, ásirese joǵary oqý oryndary úshin mańyzdy bolatynyn basa aıtty.
"Bıyl eldegi joǵary oqý oryndary kópten kútken akademııalyq erkindikke qol jetkizedi. Zań qazir Májiliste, alǵashqy eki aıda birinshi oqylymnan ótedi dep úmittenemiz. Bul Qazaqstannyń árbir ýnıversıtetiniń ishki ómirin qatty ózgertedi. Ár ýnıversıtet óziniń bilim berý baǵdarlamalaryn jasaýda, engizýde erkindikke ıe bolady. Biraq, erkindikpen qatar, ár isimiz úshin jaýapkershilik te eseleı túsedi. Kez kelgen reglamenttiń bolmaýy nemese azaıýy ónimderdi ázirlep, balalarymyzǵa bilim beretin adamdarǵa úlken jaýapkershilik júkteıdi", - dedi E. Saǵadıev Oqýshylar saraıynda ótken "Úzdik JOO oqytýshysy - 2017" marapattaý keshinde.
Sonymen birge, mınıstr bıyl barlyq mamandyqtar boıynsha qazaqstandyq JOO-lardyń reıtıngi jasalatynyn, bul reıtıngtiń abıtýrıentter arasynda úlken mańyzǵa ıe bolatynyn habarlady.
"Biz Ulttyq kásipkerler palasyna, bıznesmenderge, ekonomıkanyń naqty sektorlaryna, ǴZI, qoǵamdastyqtarǵa barlyq joǵary oqý oryndarynyń bilim berý baǵdarlamalaryn baǵalaýǵa qatysýyn ótindik. Olar kelisim berdi", - dedi ol.
Mınıstrdiń málimdeýinshe, alǵash ret IT-mamandyqtar boıynsha JOO-lardyń bilim berý baǵdarlamalary baǵalandy. Reıtıng nátıjesi kelesi aıda shyǵýy múmkin.
"Ótken aptada Almatyda 83 rektor men prorektor jınalǵan otyrysta reıtıngtiń aldyn ala nátıjesin kórsettik. Bul úlken shý shyǵardy. Qalyń kópshilikke jaryqqa shyqqanda da bul reıtıng stýdentter men oqýǵa túsýdi josparlap júrgen oqýshylar arasynda úlken rezonans týdyrady. Keı stýdentter IT-mamandyqtar boıynsha eń úzdik JOO-da oqıdy ekenmin dep qýanady. Al keıbiri IT-mamandyqtar boıynsha 123-oryndaǵy JOO-da oqyp júrgenin bilip, nalýy múmkin. Buǵan daıyn bolý kerek", - dep atap ótti mınıstr.
IT-mamandyqtardan soń, pedagogıkalyq mamandyqtar boıynsha JOO-lar reıtıngi jasalady. Ári qaraı, medıtsınalyq, ekonomıkalyq, zań mamandyqtary boıynsha jalǵasady.
"Mundaı qıyn jumysqa biz emes, bizdiń qyzmetimizdiń tutynýshylary bolyp otyrǵan bıznesmender men kompanııalar, stýdentterimizdi jumysqa alatyndar qatysady. Sol sebepti, bıylǵy jyl joǵary bilimniń ne ekenin, qalaı, kim úshin jumys isteýimiz kerektigin, shynaıy tutynýshylarymyzdyń kim ekenin, olardyń bizdiń jumysty qalaı baǵalaıtynyn túsiný turǵysynda ózgeristerge toly bolmaq. Men sizderdiń túsinistikpen qaraýlaryńyzdy jáne ózderińiz eńbek etetin ýnıversıtetterdiń belsene qatysýyna kúsh salýlaryńyzdy suraımyn", - dep óz sózin túıindedi mınıstr.
