Qazaqstandyq jolaýshylar vagony nelikten shetelde jóndeledi

NUR-SULTAN. QazAqparat - Qazaqstandyq temir jol vagondary sheteldik kásiporyndarda jóndeledi. Onyń sebebin «Jolaýshylar tasymaly» AQ bas dırektorynyń orynbasary Asylhan Qaldykózov túsindirdi, dep habarlaıdy QazAqparat tilshisi.

Onyń aıtýynsha, 2019-2020 jyldary shamamen 85 vagondy jańartý josparlanǵan. Bir vagondy jańartýǵa shamamen 100 mln teńge qarjy ketedi. Al jańa vagonnyń quny 400 mln teńgeden asyp jyǵylady.

«Qazaqstanda otandyq vagon jasaý zaýyty bar bolǵanymen onyń shamasy jetpeıdi. Postsovettik keńistikte Reseı, Ýkraına jáne Belarýs zaýyttary bar. Mine, osy zaýyttar bizge qyzmet kórsetedi. Bizdegi úsh kompanııanyń eń irisi Almaty vagon jóndeý zaýyty sanalady. Biraq, olardyń shamasy jetpeıdi. Sebebi másele vagondardyń sapasyn túbegeıli jaqsartý jaıynda bolyp otyr», - dedi ol búgin Ortalyq kommýnıkatsııalar qyzmetindegi baspasóz máslıhatynda.

Bas dırektory orynbasarynyń dereginshe, qańtar aıynda jańartylǵan vagondardyń alǵashqy legi elimizge jetkiziledi.

«Olar eýropalyq standartpen ári sapamen jóndelgen. Jolaýshylar úshin barlyq qolaıly jaǵdaı jasalǵan. Naqty aıtqanda onda ornatylǵan dúnıeniń bári jańa. Bir bóligin, Balarýsta, endi birin Ýkraına men Reseıde jóndeımiz», - dedi Asylhan Qaldykózov.