Qazaqstandyq jolaýshylar áýe júk tasymalynyń tarıfterine narazy
NUR-SULTAN. QazAqparat – Air Astana áýe kompanııasy jolaýshynyń jol júgin tasymaldaýǵa qatysty shaǵymyna jaýap berdi. Áýe kompanııasy taratqan aqparat boıynsha, olarda júkterdi (bagaj) jeke tasymaldaý júıesi qalyptasqan, dep habarlaıdy QazAqparat tilshisi.
Facebook áleýmettik jelisin qoldanýshy Hákim Sabyrov «Astana, pohvalıt/pojalovatsıa» tobynda joljúgin tasymaldaýǵa narazy bolyp, ókiletti organdardan Air Astana áýe kompanııasy áreketiniń zańdylyǵyn tekserýdi suraǵan.
«Búgin, 17.08.2020 kúni saǵat 19:05-te meniń balalarym KS855 reısimen Almatydan Nur-Sultanǵa ushý kerek bolatyn. Ózderimen, ádettegideı, Almatynyń almasy men jemisin áketpek bolǵan. Bılette 23 kg-ǵa deıin júk tasymaldaýǵa ruqsat etilgeni kórsetilgen. Al olar júkti tapsyryp jatqan kezde shekteý bar ekenin málimdegen. Bul shekteýler kishi qarippen tómengi jaǵynda jazylǵan. Eski evreılik aldaý júıesi. Olarǵa tirkeý kezinde Air Astana qyzmetkerleri ár adamǵa bir júkten tıesili bolý úshin qorap pen chemodandardy óz ókilderinen 2000 teńgege oratyp alýdy usynǵan. ıAǵnı, taǵy 6000 teńge tóleý kerek. Sońynda áýejaıǵa deıin shyǵaryp salǵan týystardy qaıta shaqyryp, jemis salynǵan qoraptardy tastap ketýge májbúr boldy. QR Indýstrııa jáne ınfraqurylymdyq damý mınıstrligi monopolııalardy retteý agenttiginen osyndaı alaıaqtyq júıeniń kóshbasshysy sanalatyn Air Astana kompanııasy áreketiniń zań júzinde durys-burystyǵyn tekserýdi suraımyn», delingen Hákim Sabyrovtyń jazbasynda.
Áýe kompanııasy jolaýshynyń shaǵymyna jaýap berdi. Air Astana ókili Janna Badaýbaeva áýe kompanııasynda júkti jekelep tasymaldaý júıesi bar ekenin túsindirdi. Erejege sáıkes, bir jolaýshy 23 keliden artyq júk tasymaldaı almaıdy.
«Áýe kompanııasynyń qyzmetkerleri nusqaýlyqqa sáıkes áreket etken. Eger sizdiń birneshe qorabyńyz bolsa – bárin bir sómkege nemese chemodanǵa salýyńyz qajet. Eger kólemi normalarǵa saı kelse júkti biriktirýge ruqsat etiledi. Bul júgińizdi bortqa tıeý jáne tasymaldaýǵa qolaıly bolý úshin jáne tasymaldaý kezinde joǵalyp ketpeý úshin qajet. Sonymen qatar, koronavırýs indetimen kúres aıasynda qol júgi shektelgen bolatyn. Sol sebepti qolǵa tek áıelder sómkesi men qundy zattardy alýǵa ǵana ruqsat bar», - dep túsindirdi áýe kompanııasynyń ókili.
Sonymen qatar, áýe kompanııasynyń baspasóz qyzmeti júktiń salmaǵy normadan asyp ketkende tarıftiń qalaı ózgergenin aıtyp berdi.
«Salmaǵy asyp ketken júktiń baǵasy baǵyt pen tólem jasaý ýaqytyna baılanysty. Máselen, Almaty-Nur-Sultan baǵytyndaǵy qosymsha júk jeńildikpen 7 myń teńge turady, al eger ushýyńyzǵa bir táýlikten az ýaqyt qalsa – 10 myń teńge. Eger jolaýshynyń júgi normadan asyp ketse oǵan qosymsha orynǵa tóleı salǵan tıimdi, biraq onyń baǵasy jeńildiksiz 10 myń teńge bolady. Eger salmaǵy asyp ketken júkke bólek tóleıtin bolsa júıe oǵan 17 myń teńge eseptep beredi. 10 myń teńgesi orynǵa jáne 7 myń teńgesi asyp ketken júkke. Sebebi bizde júkti jekelep tasymaldaý júıesi qalyptasqan. Sol sebepti jolaýshylarǵa artyq kelini qolǵa alýdy usynady», - dep túsindirdi baspasóz qyzmetiniń ókilderi.
Áýe kompanııasy byltyrdan bastap júk tasymaldaý erejesiniń ózgergenin eske saldy.
Bagajdyń tegin normasy Piece concept halyqaralyq júıesi boıynsha júktiń alatyn oryndar sanyna qaraı esepteledi. Buryn tasymaldanatyn bagajdyń salmaǵyn esepteý Weight concept júıesi boıynsha júrgiziletin. Bul tájirıbeni halyqaralyq tasymaldaýshylar keńinen qoldanady.
2019 jyldyń 7 tamyzynan bastap tańdaǵan tarıfke baılanysty jolaýshylar ózderimen bir nemese eki sómke alyp júredi. Bir sómkeniń maksımaldy salmaǵy ekonom-klassta 23 kg jáne bıznes-klassta 32 kg. Eger sizge kóbirek júkti tasymaldaý kerek bolsa ushardan kem degende 24 saǵat buryn 30% jeńildikpen oryn satyp ala alasyz.
Avtor: Araılym Murat
