Qazaqstandyq joǵary oqý oryndary ǵarysh mamandaryn daıyndaı alady - QR Ulttyq ǵarysh agenttigi tóraǵasynyń orynbasary M.Moldabekov
nbsp; ASTANA. Mamyrdyń 20-sy. QazAqparat /Arman Asqarov/ - Qazaqstandyq joǵary oqý oryndarynyń áleýeti ǵarysh salasyndaǵy mamandardy daıarlaýǵa jetedi.
Búgin Astanada bastalǵan «Daǵdarystan keıingi kezeńde ǵarysh salasyndaǵy mamandardy daıarlaý» taqyrybyndaǵy «dóńgelek ústelde» QR Ulttyq ǵarysh agenttigi tóraǵasynyń orynbasary Meıirbek Moldabekov osylaı aıtty, dep habarlaıdy QazAqparat.
Onyń aıtýynsha, búginde shetelde ǵarysh salasyndaǵy kásibı mamandardy daıarlaý jumysy sol eldiń azamattyǵyn alý jáne daıyndyq kýrstarynyń qysqa bolýyna baılanysty oıdaǵydaı júzege aspaı jatady. «Bul máseleni sheshýge qajetti bizdiń joǵary oqý oryndarynyń búgingi áleýeti ábden jetkilikti. Sondyqtan ony naqty iske jumyldyrý qajet. Osy oraıda eń bastysy, ǵarysh salasyndaǵy kásiporyndardyń búgingi suranysyn jáne osy suranysty óteı alatyn joǵary oqý oryndarynyń múmkindikterin egjeı-tegjeıli zerttep, anyqtap alǵan jón», - deıdi M.Moldabekov.
Jıyn barysynda «Ǵarysh zertteýleri men tehnologııalary ulttyq ortalyǵy» AQ-synyń vıtse-prezıdenti Esmaǵambet Ismaıl atap kórsetkendeı, búgingi tańda otandyq ǵarysh salasyna 27 mamandyq boıynsha daıyndyq júrgizý qajet. «Máselen, qazirgi kezde tek «Báıterek» keshenin iske qosý jumysyna ǵana 1122 mamandy tartý kerek», - deıdi ol.
