Qazaqstandyq jobalar búkil túrki áleminde zor mańyzǵa ıe – ázerbaıjandyq ǵalym

BAKÝ. QazAqparat - QR Prezıdentiniń «Uly dalanyń jeti qyry» atty maqalasymen tanysa otyryp, Nursultan Nazarbaevtyń basshylyǵyndaǵy Qazaqstannyń josparly túrde túrki álemine asa qajetti jobalardy iske asyryp jatqanyna tamsana ári qyzyǵa qaraýǵa bolady. Ázerbaıjannyń Ulttyq ǵylym akademııasynyń Quqyq jáne adam quqyǵy ınstıtýtynyń ǵylymı qyzmetkeri, Kavkaz tarıhy ortalyǵynyń dırektory Rızvan Gýseınov osylaı dep pikirin bildirdi, dep habarlaıdy QazAqparat tilshisi.

«Qazaqstan Prezıdentiniń maqalasyn oqı otyryp, onyń mańyzy men barlyq taraýy búkil túrki halyqtary úshin jahandyq mańyzǵa ıe ekendigin atap ótkim keledi. Onyń búkil túrki áleminde aıtýly áleýeti barshylyq. Tereńirek túısinsek, onyń shekarasynyń shet-shegi joq», - dedi Gýseınov «QazAqparat» HAA menshikti tilshisine bergen suhbatynda.

Onyń aıtýynsha, maqaladaǵy barlyq jeti baǵyt - túrki sana-sezimin jańǵyrta otyryp, barsha túrki elderiniń bolashaǵyna úmit syılaıdy.

«Ótkennen sabaq ala otyryp, búginimizge baǵa bere alamyz. Bul rette, eń bastysy, biz qalaı jáne qaı baǵytqa jyljýymyz kerek degen suraqqa jaýap bar. Osy oraıda Qazaqstannyń jahandyq jobalaryna qoldaý bildirgimiz keledi», - deıdi ol.

Ǵalymnyń paıymdaýynsha, 2019 jyly ótkiziletin túrkologtardyń sezi túrki elderiniń ıntellıgentsııasy arasyndaǵy baılanysty nyǵaıtyp, birlikti bekemdeı túsý jolynda úlken ról atqarady.

«Kavkaz tarıhy ortalyǵy túrki muralaryn, mádenıeti men tarıhyn saqtaý boıynsha qazaqstandyq tarap bastaǵan jahandyq jobalardy iske asyrýshylardyń qatarynda bolǵysy keledi. Qazaqstannyń qolǵa alyp jatqan sharýasy - keleshektegi álemdik protsesterde túrki mádenıeti men tarıhynyń jahandyq rólin túsindirýde teńdessiz úles qosary anyq», - deıdi ortalyq dırektory.

Eske sala ketsek, 21 qarasha kúni Elbasy Nursultan Nazarbaevtyń «Uly dalanyń jeti qyry» atty maqalasy jarııalanǵan bolatyn.