Qazaqstandyq jigit qoqys tastaý mádenıetin qalyptastyrýdy usyndy
ALMATY. QazAqparat - Almatyda ótken «3.2.1.Start!» baıqaýynda ınnovatsııalyq mektep pen qoqysty ajyratyp jınaý týraly usynystar qazylardyń erekshe nazaryn aýdardy, dep habarlaıdy QazAqparat tilshisi.
«3.2.1.Start!» jobasynyń jeńimpazy atanǵan «Tazalyk» ekoboks jobasynyń avtory Aıbek Rahym 1 500 000 teńge grantty jeńip aldy. Ol bul aqshany óz ıdeıasyn júzege asyrýǵa jumsamaq.
Aıbektiń jobasy arnaıy ekobokstar daıyndap, halyq arasynda qoqys tastaýdyń jańa mádenıetin qalyptastyrýdy kózdeıdi. Bul jobany odan ári jańǵyrtý úshin Aıbek mobıldi qosymsha da oılap tapqan. «Tazalyk» mobıldi qosymshasy arqyly turǵyndardyń áreketin baqylaýǵa bolady. Atalǵan joba shıkizattyń qaıta óńdeý zaýytyna túsýine septigin tıgizbek.
Qazylar alqasy Amıra Súleımenova atty qatysýshyny da arnaıy syılyqpen marapattady. Amıra múmkindigi shekteýli jandarǵa ınnovatsııalyq mektep ashý jobasyn qorǵap shyqty. Ol erekshe jandardyń ǵalamtor arqyly jańa bilim alyp, qoǵamǵa beıimdelýin qalaıdy. Olardy onlaın oqytý kýrsyn ashý úshin Amıra kompıýterge qol jetkizdi.
