Qazaqstandyq jeńilatlet Olga Rypakova Rıo-de-Janeıroda ótetin Olımpıadaǵa joldamany jeńip aldy

ASTANA. QazAqparat - QR QM Ortalyq armııa sport klýbynyń kapıtany, qazaqstandyq jeńil atletshi Olga Rypakova Shanhaıda ótken Diamond Leauge (Brıllıant lıgasy) saıysynyń ekinshi týrynda qola medaldi jeńip aldy. Onyń osynaý jarystaǵy sátti jeńisi Rıo-de-Janeıro Olımpıadasyna joldama alýyna múmkindik berdi, dep habarlady QR Qorǵanys mınıstrliginiń baspasóz qyzmeti.

Olga Rypakova óziniń sporttyq jolynda úshinshi ret álemdik dodaǵa qatysatyn bolady. Buǵan deıin sportshy 2008 jyly Pekın olımpıdasyna qatyssa, 2012 jyly London olımpıadasynda altyn medaldi ıelenip, Olımpıada chempıony atandy.

«Halyqaralyq jarystarda bıikten kórinip júrgen talantty sportshy Qazaqstannyń jáne elimizdiń Qarýly Kúshteriniń atyn shyǵarýda. Onyń jeńisteri áskerı qyzmetshiler men jastardyń sportpen aınalysýǵa degen qyzyǵýshylyǵyn týdyryp, yntalandyrady», - dep atap ótilgen habarlamada.