Qazaqstandyq jeńil atlet Lıtvada jeńiske jetti
ASTANA. QazAqparat - Qazaqstandyq jeńil atlet Krıstına Morozova Lıtvada ótken halyqaralyq týrnırde sporttyq jarystan jeńiske jetti, dep habarlaıdy QazAqparat tilshisi.
QR Jeńil atletıka federatsııasy málim etkendeı, Krıstına aldaǵy qazan aıynda Býenos-Aırestegi jasóspirimder Olımpıadasyna qatysady. Osy iri dodanyń aldynda sportshy óziniń daıyndyǵyn bir pysyqtap aldy.
Lıtvanyń Drýskınskaı qalasynda ótken jarysta 17 jastaǵy atlet 3 shaqyrymdyq sporttyq júristen qatysty. Saıysta 2001-2002 jyly týǵan jas atletter baq synady. Jerlesimiz qarsylastarynyń aldyn orap, márege 14 mınýt 51 sekýndta jetti. Ekinshi oryn alǵan sportshynyń ýaqyt kórsetkishi - 15.05 mınýt bolsa, úshinshisi - 15.21.
Aıta keteıik, Morozova Býenos-Aıreste 5 shaqyrymdyq sporttyq júristen óner kórsetedi.
