Qazaqstandyq jeńil atlet Azııa chempıonatynyń qola medalin enshiledi
NUR-SULTAN. QazAqparat - Jeńil atletıkadan Dohada ótip jatqan Azııa chempıonatynda 400 metrge júgirýden erler arasyndaǵy báseke aıaqtaldy. Qazaqstandyq Mıhaıl Lıtvın márege úshinshi bolyp keldi, dep habarlaıdy QazAqparat.
QR Ulttyq Olımpıadalyq komıtetinen málim etkendeı, eki kún ishinde qazaqstandyq jelaıaq elimizdiń eki rekordyn ornatty. Keshe ótken jartylaı fınaldyq jarysta ol atalǵan qashyqtyqty 45,38 ýaqyt kórsetkishinde júgirip ótken. Búgin Lıtvın 400 metrdi 45,25 sekýndta baǵyndyrdy. Bul Qazaqstannyń jańa rekordy.
Sondaı-aq ol 2019 jylǵy álem chempıonatyna qatysýǵa múmkindik beretin normatıvti oryndady.
Aıta keteıik, M.Lıtvın 2018 jyldyń shildesinde Almatyda ótken Ǵusman Qosanovty eske alýǵa arnalǵan dástúrli jarysta (erler arasynda 400 metr) 34 jyl saqtalǵan Qazaqstan rekordyn jańartqan bolatyn.
Buǵan deıin habarlaǵanymyzdaı, Dohadaǵy Azııa chempıonatynda áıelder arasyndaǵy synda Elına Mızına kúmis medal aldy.
