Qazaqstandyq jazýshylardyń shyǵarmalary parsy oqyrmandaryna jol tartady
ASTANA. QazAqparat - Qazaqstannyń jazýshylar odaǵy men Irannyń jazýshylar qaýymdastyǵy ózara yntymaqtastyq týraly memorandým bekitti, dep habarlaıdy QazAqparat tilshisi.
Saltanatty rásim Astanada «Qazirgi zamanǵy sóz energııasy» atty halyqaralyq ádebı forýmy aıasynda ótti. Forýmnyń ekinshi kúni proza, poezııa, dramatýrgııa jáne aýdarma isindegi ózekti máseleler 4 sektsııaǵa bólinip talqylanýda.
«Qazaqstannyń zamanaýı ádebıeti parsy tiline óte az aýdarylǵan. Búgingi memorandým parsy aýdıtorııasyna qazaq ádebıetin nasıhattaýǵa jáne aýdarýǵa serpin beredi dep úmittenemin. Ekinshi jaǵynan, klassıkalyq parsy ádebıeti barsha álemge tanymal bolsa da, qazirgi parsy ádebıetin biletinder az. Búgingi kelisimnen soń, qos halyqqa qazaq jáne parsy ádebıetiniń zamanaýı ókilderi keńinen tanylaryna senimdimin», - dep atap ótti Iran jazýshylar qaýymdastyǵynyń tóraǵasy, aqyn, jazýshy Hadı Saerı Kıasarı.
Óz kezeginde Qazaqstan Jazýshylar odaǵynyń basshysy Ulyqbek Esdáýlet eki eldiń baǵzydan qalyptasqan ádebı baılanysyn damyta túsýge nıetti ekenin jetkizdi.
«Parsy ádebıeti álemge asyl qazynalar syılaǵan baı ádebıet bolyp sanalady. Shahnamadan bastap, Rýmıdiń, Jámıdiń, Saǵdıdyń, basqa da Shyǵys júldyzdarynyń shyǵarmalary bizde aýdarylyp kelgen. Árbir býyn uly aqyndar men jazýshylardy qaıtalap aýdaryp usynyp otyrady. Bizde Turmaǵambet Іztileýovtan bastap, parsy tilinen aýdaratyn úlken aýdarmashylar mektebi qalyptasqan. Almatylyq Safar Abdýllo aýdarǵan M. Áýezovtyń áńgimeleri, Abaıdyń qara sózderi osymen tórtinshi ret shyǵyp jatyr. Sol joldy jalǵastyryp, qazaq ádebıetin parsy oqyrmandaryna tanystyra túsýdi kózdep otyrmyz», - dedi Ulybek Esdáýlet.
