Qazaqstandyq jazýshy Dýrnıam Mashýrovanyń «Ana ósıeti» kitaby Londondaǵy ádebı festıvalde birinshi júldege ıe boldy

ASTANA. 19 qarasha. QazAqparat - Ulybrıtanııada 7-11 qarasha aralyǵynda ótken 2013 jylǵy "Open Central Asia Forum" ádebı festıvali komıteti úsh sanatta: Ádebıet, Aýdarma jáne Bezendirý atalymdarynda óziniń jeńimpazdaryn atady.

Oǵan 20-dan astam elden usynylǵan 168 avtordyń shyǵarmalary arasynan 28 qatysýshy fınalǵa iriktelip alyndy. Onyń nátıjesi boıynsha qazaqstandyq jazýshy, halyqaralyq PEN-klýbtyń múshesi Dýrnıam Mashýrovanyń «Ana ósıeti» romany kitaptyń aýdarmasy úshin 1-shi jáne bezendirilýi úshin 3-shi júldeli oryndarǵa ıe boldy. Bul kitap 2009 jyly uıǵyr tilinde «Jazýshy» baspasynan shyqqan bolatyn, 2010 jyly orys tiline aýdaryldy.

Kitap AQSh-ta, Túrkııada jáne Qazaqstanda oıdaǵydaı tanystyrylyp, jurtshylyq tarapynan jaqsy baǵa alǵannan keıin Ulybrıtanııa men Eýropa elderiniń oqyrmandaryna usynyldy. Qazir bul kitap aǵylshyn tiline aýdarylýda.

Roman ótken ǵasyrdyń 30-jyldarynan bastap búgingi zamanǵa deıingi tarıhı oqıǵalarmen shendestirilip, Orta Azııa áıelderiniń taýqymetti ómirin baıandaıtyn otbasylyq hıkaıat.

D.Mashýrovanyń «Ana ósıeti» romany mádenı murany saqtaýǵa, ata-baba árýaǵyn qurmetteýge jáne qandaı qıynshylyq bolsa da adam bolyp qalýǵa úndeıdi.

D.Mashýrova - kóp jyldar boıy Taldyqorǵan oblysynyń Alakól aýdandyq partııa komıtetiniń birinshi hatshysy bolǵan kórnekti memleket qaıratkeri Azat Mashýrovtyń zaıyby. Budan buryn jubaıynyń jarqyn ómirine arnaǵan «Ómir tekke ótken joq» dep atalatyn derekti novellasy jaryq kórgen bolatyn. Ol "Dervıshı" toby men Nurbúbi Námetovanyń oryndaýyndaǵy ánderge sóz jazdy. Mashýrovanyń ocherkteri respýblıkalyq «Ýıgýr avazı » gazetinde jıi jarııalanyp turady.